रोमान्चक खेलमा नेपाली राइनोज पराजित, न्यु होराइजन र एसपीए सेमीफाइनलमा

विकेटनेपाल, माघ २ 

रुस्लान कप क्रिकेटको सेमीफाइनल समीकरण पुरा भएको छ l आइतबार सम्पन्न तेश्रो र चौथो क्वार्टरफाइनल खेलमा न्यु होराइजन र सुदुरपस्चिमान्चल एकेडेमी ( एसपीए ) ले जित हात पार्दै सेमीफाइनलमा स्थान पक्का गरे l

सोमबार हुने पहिलो सेमीफाइनलमा नेपाल पुलिस क्लबले न्यु होराइजन तथा दोश्रो सेमीफाइनलमा त्रिभुवन आर्मीले सुदुरपस्चिमान्चल एकेडेमीको सामना गर्नेछ l

टियु मैदानमा सम्पन्न आजको पहिलो खेलमा नेपाली राइनोजलाई न्यु होराइजनले ८ रनको अन्तरले पराजित गर्यो l टस हारेर पहिले ब्याटिंग गर्दै होराइजनले पहिलो इनिंगमा बनाएको १०४ रनको प्रतिउत्तरमा ब्याटिंग गरेको राइनोजले ९६ रन मात्रै बनाउन सक्यो l  ( स्कोरकार्ड )

होराइजनका बलर कृष्ण कार्कीले ३ विकेट ( ४-२-९-३ ) तथा शाहब आलम र बिक्रम भुसालले २/२ विकेट आफ्नो पक्षमा पार्दै राइनोजलाई सस्तोमा समेट्न महत्वपूर्ण योगदान दिए l ब्याटिंग तर्फ होराइजनका निर्मल थापाले सर्बाधिक ३० रन बनाए l राइनोजका शरद भेसावकर र सुशील कंडेलले ३/३ विकेट आफ्नो पक्षमा पारे l खराब ब्याटिंग गरेको राइनोजको लागि सोनु तामांगले सर्बाधिक २७ रन योगदान दिए l

एसपीएको सहज जित  ( स्कोरकार्ड ) 

आयोजक काठमाडौँ क्रिकेट ट्रेनिंग सेन्टर ( केसीटिसी ) लाई ४६ रनको ठुलो अन्तरले पराजित गर्दै एसपीएले सेमीफाइनल यात्रा तय गर्यो l टस जितेर पहिले ब्याटिंग गर्दै २० ओभरमा १६०/५ को स्कोर एसपीएले खडा गर्यो l

राजबिर सिंहले एसपीएको लागि अर्धशतकीय इनिंग खेले l उनले ४३ बलमा ८ चौका प्रहार गरे l यस्तै सन्दिप धामीले ३३ र दिपेन्द्र थापाले २१ रन बनाए l सुर्य लामा र सुमित झाले केसीटिसीको लागि २/२ विकेट लिए l

जवाफमा केसीटिसीले २० ओभर ब्याटिंग गर्दै ११४ रन मात्रै बनाउन सक्यो l बिनोद लामाले ३ विकेट ( ४-०-१२-३ ) तथा महेश अधिकारी र अमित पौडेलले २/२ विकेट हात पारे l

सुमित महर्जनले सर्बाधिक ४१ रन प्रहार गरेपनि केसीटिसीका अन्य ब्याट्सम्यानहरुले ठुलो इनिंग खेल्न सकेनन् l