काठमाडौं । लुम्बिनी प्रदेशमा आइतबारबाट सुरु भएको पीएम कप पुरुष क्रिकेट प्रतियोगितामा कर्णली प्रदेश, लुम्बिनी प्रदेशर विभागीय टोली एपीएफ क्लबले विजयी सुरुआत गरेका छन्।
दाङको लमहीमा भएको खेलमा कर्णाली प्रदेशले सुदूरपश्चिम प्रदेशमाथि ७९ रनको जित निकालेको हा।
टस जितेर पहिले ब्याटिङ गरेको कर्णाली ४०.४ ओभरमा १५५ रनमा अलआउट भएको थियो। उसका लागि अर्जुन घर्तीले जोडेको ७१ रन महत्वपूर्ण सावित भयो। बलिङमा सुदूरपश्चिमका हेमन्त धामीले ४ विकेट लिए।
१५६ रनको लक्ष्य पछ्याएको सुदूरपश्चिम २१ ओभरमा ७६ रनमै अलआउट भयो। सुदूरपश्चिमका लागि खडक बोहाराले सर्वाधिक २७ रन बनाए। बलिङमा कर्णालीका दीपेन्द्र रावतले सात विकेट लिए। प्लेयर अफ दि म्याच रावतले ९ ओभरमा ३ मेडन राख्दा ३३ रन दिए।
यस्तै, भैरहवामा भएको खेलमा घरेलु टोली लुम्बिनीले कोशी प्रदेशलाई २६ रनले पराजित गर्यो।
टस जितेर पहिले ब्याटिङ गरेको लुम्बिनी ४८ ओभरमा २०८ रनमा अलआउट भयो। लुम्बिनीका लागि आकाश त्रिपाठीले ६६ रन र ओपनर मृनाल गुरुङले ४४ रन बनाए। नर सार्कीले ३२ बलमा ४५ रनको योगदान दिए।
२०९ रनको लक्ष्य पछ्याएको कोशी ४२.२ ओभरमा १८२ रनमा अलआउट भयो। कोशीका लागि सुजन थपलियाले ३५ रन र ओपनर चिराग साहले ३१ रन बनाए।
बलिङमा लुम्बिनीका अजय चौहानले ५ विकेट लिए भने रमेश कुर्मीले लिएको ३ विकेट जितको आधार बन्यो।
एक्स्ट्राटेक ओभल क्रिकेट मैदानमा भएको अर्को खेलमा एपीएफ क्लबले विजयी सुरुवात गरेको छ।
एपीएफले बागमतीलाई १०० रनले हराएको हो। एपीएफले दिएको १७५ रनको लक्ष्य पछ्याएको बागमती २८.२ ओभरमा ७४ रनमा अलआउट भयो। बागमतीका लागि शुभ कंसाकारले सर्वाधिक १६ रन बनाए। अन्यले दोहोरो अंकमा रन बनाउनै सकेनन्।
एपीएफका लागि कमलसिंह ऐरीले ४ विकेट लिए। रोहित पौडेल र अमरसिंह राउटेलाले २–२ तथा अविनाश बोहराले १ विकेट लिए।
टस हारेर पहिले ब्याटिङ गरेको एपीएफ ४४ ओभरमा १७४ रनमा अलआउट भएको थियो। एपीएफका लागि सन्दीप जोराले सर्वाधिक ३७ रन बनाए। अमरसिंह राउटेला २६ रनमा अविजित रहे। दिपक बोहराले २५ रन बनाए।
बागमतीका लागि रिजन ढकालले ५ विकेट लिए। नन्दन यादवले ३ तथा सुर्य तामाङले २ विकेट लिए।
