विकेटनेपाल, २१ पुष
– चितवन
चौथो क्याची एसएसपी कप २०१७ को बुधबार भएको दुई खेलमा ग्रेस वीरेन्द्र ( भरतपुर ) र नेपाल पोलिटेक्निक कलेज ( भरतपुर ) विजयी भएका छन् ।
समुह चरणको पहिलो खेलमा ग्रेस वीरेन्द्रले काठमाडौंको ग्रेट हिमालयन क्रिकेट एकेडेमीलाई ८ विकेटले पराजित गर्यो। नौ बिगाहा मैदानमा टस हारेर ब्याटिङको निम्तो पाएको ग्रेट हिमालयनले घटाइएको १५ ओभरमा ८ विकेट गुमाउदै ७८ रन बनाएको थियो । हिमालयनका लागि योगेश बोधले २६, अन्सरुल रेनले ११, केशव अधिकारीले ११ र उमेशचन्द ठकुरीले ११ रन जोडेका थिए । बलिङतर्फ संघर्ष पौडेलले ३ र प्रदिप ऐरीले २ विकेट लिएका थिए ।
७९ रनको विजय लक्ष्य ग्रेस वीरेन्द्रले ८ ओभरमा दुई विकेट गुमाएर पुरा गर्यो । वीरेन्द्रको जितमा प्रदिप ऐरीले अविजित ३७ बनाए । उनले २२ बलमा ३ छक्का र ३ चौका प्रहार गरेका हुन् । सोनु तामाङले १९ र मेहबुब अलामले १२ रन जोडे । अलराउन्ड प्रदर्शन गरेका प्रदिप ऐरी म्यान अफ द म्याच घोषित भएका छन् ।
बुधबारनै सम्पन्न अर्को खेलमा भरतपुरको नेपाल पोलिटेक्निक कलेजले धनगढीको सुदुर पश्चिम एकेडेमीलाई ९ रनले हराएको छ । टस हारेर ब्याटिङको निम्तो पाएको नेपाल पोलिटेक्निक कलेजले २० ओभर खेल्दै ८ विकेटको क्षतिमा १ सय १६ रनको योगफल बनायो ।
पोलिटेक्निकका लागि आकाश थापाले सर्वाधिक ५८ रन बनाए । ५४ बल खेलेका उनले १ छक्का र ७ चौका प्रहार गरेका थिए । त्यस्तै, सुनिल धमलाले १८ र शरद भेसवाकरले ८ रन जोडेका थिए । बलिङतर्फ धनगढीका सुरेन्द्र चन्दले ३ विकेट लिए ।अर्धशतकीय पारी खेलेका पोलिटेक्निकका आकाश थापा म्यान अफ द म्याच बनेका हुन् ।
क्याची एसएसपी कपमा बिहिबारको पहिलो खेल नारायणी क्रिकेट एकेडेमी ( हेटौंडा ) र बुटवल ११ बिच हुनेछ । त्यस्तै दोश्रो खेलमा सुदुर पश्चिम एकेडेमी, धनगढी र क्यापिटल कलेज अफ रिसर्च सेन्टर, काठमाडौंबीच दिउंसो १२ः३० बजे हुनेछ ।
( फिचर फोटो : फाइल )