काठमाडौं । दक्षिण अफ्रिकाले वेस्ट इन्डिज र अमेरिकामा जारी नवौं संस्करणको टी-२० विश्वकपको २१ औं खेलमा बंगलादेशलाई १ सय १४ रनको लक्ष्य दिएको छ ।
अमेरिकाको न्युयोर्कमा टस जितेर ब्याटिङ गरेको दक्षिण अफ्रिकाले निर्धारित २० ओभरमा ६ विकेट गुमाएर १ सय १३ रन बनायो ।
दक्षिण अफ्रिकाका लागि हेनरिक क्लासेनले ४४ बलमा २ चौका र ३ छक्काको सहयोगमा ४६ रन बनाए । डेबिड मिलरले ३८ बलमा १ चौका र १ छक्काको सहयोगमा २९ रन बनाए ।
४ दशमलब २ ओभरमा २३ रनमा ४ विकेट गुमाएको दक्षिण अफ्रिकाका क्लासेन र मिलरले पाँचौ विकेटका लागि ७९ बलमा ७९ रनको महत्पुर्ण साझेदारीका साथ मध्यम योगफलसम्म पुर्याउन योगदान गरे ।
ओपनर क्विटन डि ककले ११ बलमा १८ रन बनाए ।
बंगलादेशका लागि तान्जिम हसन सकिबले तीन तथा तस्किन अहमदले दुई विकेट लिए ।
आफुले खेलेका दुवै खेलमा जितका साथ दक्षिण अफ्रिका समूह डी को शीर्ष स्थानमा छ । यस खेलमा जित निकाल्दै दक्षिण अफ्रिका सुपर आठमा स्थान पक्का गर्ने पहिलो टोली बन्न चाहन्छ ।
उता, प्रतियोगितामा पहिलो खेलमा श्रीलंकालाई हराउँदै उच्च मनोबलका साथ न्यूयोर्क आएको बंगलादेश पनि यो खेल जितेर सुपर आठको सम्भावना बलियो बनाउन चाहन्छ ।
