क्यानडामा जारी ग्लोबल टि-२० क्यानडा लिग अन्तर्गत उत्कृस्ट लयमा रहेका नेपाली लेग स्पिनर सन्दिप लामिछानेले चौंथो खेल खेल्दा तेश्रो पटक ‘मोमेन्ट अफ द म्याच’ अवार्ड जित्न सफल भएका छन्।
मिसीसागा प्यान्थर्स विरुद्ध शनिवार विहान सम्पन्न खेलमा सन्दिपले ३ विकेट लिएका थिए जुन क्रममा एकै ओभरमा दुई विकेट लिंदै खेलको दिशा परिवर्तन गरेका कारण उनलाई उक्त अवार्ड दिईएको हो। उनले आक्रामक ब्याटिंग गरिरहेका क्यामरन डेलपोर्ट र जेम्स निशमको महत्वपूर्ण विकेट लिएका थिए।
पाँच सय डलर पुरस्कार राशिको उक्त अवार्ड तिन पटक जित्दै सन्दिपले आफ्नो खातामा पन्ध्र सय डलर ( करिब रु १ लाख ९६ हजार ५ सय ) जम्मा गरेका छन्।
यस अघि सन्दीपले पहिलो खेलमा मोन्टरियल टाइगर्स विरुद्ध २ विकेट लिंदा तथा तेश्रो खेलमा टोरोन्टो नेसनल्स विरुद्ध २ विकेट लिंदा समेत उक्त अवार्ड जितेका थिए। राम्रो प्रदर्शन गरेता पनि सन्दिप प्लेयर अफ द म्याच अवार्ड भने जितेका छैनन्।
अर्का नेपाली खेलाडी दिपेन्द्र ऐरीले पनि भानकुभर नाइट्स विरुद्ध बुधबारको खेलमा मोमेन्ट अफ द म्याच अवार्ड जितेका थिए।