भैरहवा, २३ माघ ।
भैरहवाको सिद्धार्थ रंगशालामा जारी मुख्य सुपरलिग अन्तरगत ‘ए’ डिभिजनको समूह ‘ए’ को आइतबार भएको दोस्रो खेलमा शंकरनगर क्रिकेट क्लबलाई ३३ रनले हराउँदै देवदह क्रिकेट क्लब विजयी भएको छ ।
जितसँगै देवदहले सेमिफाइनलको सम्भावनालाई बलियो बनाएको छ भने दुई खेल हारेको शंकरनगर ‘ए’ डिभिजनबाट ‘बी’ डिभिजनमा घटुवा भएको छ । टस जितेर पहिला ब्याटिङ रोजेको देवदहले निर्धारित ४० ओभरको खेलमा ३७ दशमलव ५ ओभरमा सबै विकेट गुमाउँदै १ सय ८९ रन बनाएको थियो । प्रतिउत्तरमा मैदान छिरेको शंकरनगरले ३५ दशमलब ४ ओभरमा अलआउट हुँदै १ सय ५६ रन मात्रै बनाउन सक्यो ।
देवदहका लागि सुमन पाण्डेले ५६, सुरज दराई मगरले ४१ र रोशन गौतमले २५ रनको योगदान दिए । बलिङमा शंकरनगरका लागि लक्की पाण्डेले ४, धिरज शाहीले २, सुनिल पौडेल र ईश्वर गुरुङले १/१ विकेट लिए । व्याटिङमा शंकरनगरका लागि ईश्वर गुरुङले ३१, धिरज शाहीले २३ र वियु न्यौपानेले नटआउट २१ रन बनाए पनि अन्य ब्याट्सम्यान नचल्दा जितका लागि पर्याप्त हुन सकेन ।
देवदहका लागि किर्तीमान ढकालले ३, सरगम चौधरी, रोशन गौतम र पुरन थापाले २/२ विकेट तथा सुरज दराई मगरले १ विकेट लिए । खेलको म्यान अफ द म्याच देवदहका सुमन पाण्डे घोषित भए ।
रुपन्देही क्रिकेट संघको आयोजना, नेपाल टेलिकमको प्रमुख प्रायोजन र बुम रेमिटको सहप्रायोजनमा जारी प्रतियोगिता अन्तरग सोमबार समूह बीमा रहेका ज्ञानोदय क्रिकेट क्लब करहिया र एपेक्स क्रिकेट क्लब शंकरनगरबीच प्रतिस्पर्धा हुनेछ । जारी प्रतियोगिता फागुन ४ गतेसम्म संचालन हुने छ । प्रतियोगिताका बिजेताले ५० हजार, उपबिजेताले २५ हजार, उत्कृस्ट खेलाडीले १० हजार, उत्कृस्ट बलर र उत्कृस्ट ब्याट्सम्यान दुबैले ५/५ हजार नगद पुरस्कार पाउने छन् ।
