युएईमा आज सुरु भएको अन्डर-१९ एसिया कप अन्तर्गत पहिलो दिन सम्पन्न खेलहरुमा पाकिस्तान, भारत र श्रीलंका विजयी भएका छन्।
समुह ‘ए’ अन्तर्गतको पहिलो खेलमा भारतले आयोजक युएईलाई १५४ रनले पराजित गर्यो। भारतले दिएको २८३ रनको लक्ष्य पछ्याएको युएईले १२८ रन मात्र बनाउन सक्यो। भारतको जितमा ब्याटिंगमा ओपनर हरनुर सिंहले सर्वाधिक १२० रन, कप्तान यश धुलले ६३ रन तथा राजवरधान हंगरगेकरले ४८ रन बनाए भने बलिंगतर्फ हंगरगेकरले ३ विकेट तथा गर्भ सांगवान , विकि ओस्टवाल र कौशल ताम्बेले समान दुई विकेट लिए।
दिनको समुह ‘ए’ अन्तर्गतकै दोश्रो खेलमा पाकिस्तानले अफगानिस्तानलाई ४ विकेटले पराजित गर्यो। पहिलो ब्याटिंग गर्दै अफगानिस्तानले ५२ रन मात्र बनाउन सकेपछि पाकिस्तानले ६ विकेट गुमाएर लक्ष्य पुरा गर्यो। पाकिस्तानको बलिंगमा एहमद खानले ३ तथा जिशान जमिर र अवेस अलिले समान दुई विकेट लिए। अफगानिस्तान बलर नुर एहमदले ३ तथा बिलाल सामीले २ विकेट लिए पनि जित्न पर्याप्त भएन।
दिनको समुह ‘बि’ अन्तर्गतको खेलमा श्रीलंकाले कुवेतलाई २७४ रनले पराजित गर्यो। श्रीलंकाले दिएको ३२४ रनको लक्ष्य पछ्याएको कुवेतले ४९ रन मात्र बनाउन सक्यो। श्रीलंकाको जितमा ब्याटिंगमा पवन पथीराजाले ८६, रनुदा सोमरथ्नेले ६०, चमिन्दु विक्रमासिंघे र शेभोन ड्यानियल ले समान ५४ रन बनाए भने बलिंगमा कप्तान दुनिथ वेलालागेले ४ विकेट, सदिशा राजापाक्षले ३ तथा मथिशा पाथीरानाले २ विकेट लिए।
प्रतियोगिता अन्तर्गत नेपाल समुह ‘बि’ मा छ जुन समुहमा श्रीलंका, बंगलादेश र कुवेत छन्। नेपालले पहिलो खेल शुक्रबार ( डिसेम्बर २४ ) शारजाह क्रिकेट स्टेडियममा खेल्नेछ। खेल नेपाली समय ११:१५ बजे बिहान सुरु हुनेछ।
