काठमाडौंं । प्रधानमन्त्री कप एकदिवसीय राष्ट्रिय क्रिकेट प्रतियोगितामा त्रिभुवन आर्मीले सुदूरपश्चिम प्रदेशलाई पराजित गरेको छ ।
टीयु मैदान कीर्तिपुरमा आर्मीले सुदूरलाई ९७ रनले पराजित गरेको हो ।
आर्मीले दिएको २ सय ६३ रनको लक्ष्य पछ्याएको सुदूरले ४९ दशमलब १ ओभरमा अल आउट हुनु पुर्व १ सय ६५ रन बनायो ।
सुदूरका लागि किरण ठगुन्नाले ७४ बलमा ६८ रन बनाए । किरणले ६ चौका र ३ छक्का प्रहार गरेका थिए । शेर मल्लले ३८ बलमा २४ तथा नरेन भट्टले १८ रन बनाए ।
आर्मीका लागि जितेन्द्र मुखियाले ६ दशमलब १ ओभरमा १० रन खर्चिएर पाँच विकेट लिए । सोमपाल कामीले दुई तथा वसिर अहमद, कुशल मल्ल र साहव आलमले समान एक एक विकेट लिए ।
सुदूरका लागि टस जितेर ब्याटिङ रोजेको आर्मी ४८ दशमलब ३ ओभरमा २ सय ६२ रन बनाउँदै अल आउट भयो ।
आर्मीका लागि कुशल मल्लले ६७ बलमा ७५ रनको अर्धशतकीय ईनिङ खेले । मल्लले १० चौका र ३ छक्का प्रहार गरेका थिए । सन्दीप रजालीले ३१ बलमा ३७ तथा वसिर अहमदले ६३ बलमा ३६ रन बनाए । ओपनर सन्तोष कार्कीले २८ बलमा ३० रन बनाए ।
एक समय ८८ रन बनाउँदा ६ विकेट गुमाएर संकटमा पुगेको आर्मीका लागि वसिर अहमद र कुशल मल्लले १ सय १३ रनको शतकीय साझेदारी गरे ।
शाहब आलमले २५ बलमा २१ तथा सोमपाल कामीले ३४ बलमा ३१ रन बनाए ।
सुदूरका लागि भोजराजले भट्टले ९ दशमलब ३ ओभरमा ६३ रन खर्चिएर छ विकेट लिए । नरेन साउदले तीन विकेट लिए ।
आजको खेल जितेको आर्मीले फाइनल सम्भावना कायमै राखेको छ । सुदूरको पनि फाइनल सम्भावना भने कायमै छ ।
