काठमाडौं । अलराउन्डर कुशल मल्लको विष्फोटक अर्धशतकको सहयोगमा नेपालले नामिबियालाई १ सय ८१ रनको लक्ष्य दिएको छ ।
टियु क्रिकेट मैदान कीर्तिपुरमा टस हारेर पहिले ब्याटिङ गरेको नेपालले निर्धारित २० ओभरमा ८ विकेट गुमाएर १ सय ८० रन बनायो ।
नेपालका लागि कुशल मल्लले ३७ बलमा १ चौका र ४ छक्काको सहयोग ५५ रनको अर्धशतकीय ईनिङ खेले । आफ्नो करियरको चौथो अर्धशतक मल्लले ३० बलमा पूरा गरे । मल्ल र आरिफ शेखले ८५ रनको साझेदारी गरे । शेखले २४ बलमा ४ चौकाको सहयोगमा ३१ रन बनाए । १७ औं ओभरको तेस्रो बलमा शेख आउट भएका थिए ।
गुलसन झाले १६ बलमा १ चौका र ३ छक्काको सहयोगमा २६ रन बनाए । झा आठौं ओभरको दोस्रो बलमा बेननार्ड स्कोट्जेद्वारा आउट भए ।
अनिल शाहले १७ बलमा ३ छक्काको सहयोगमा २३ रन बनाए । कप्तान रोहित पौडेलले ९ बलमा १० रन बनाए । दोस्रो विकेटका रुपमा कप्तान पौडेल ब्रासेलले आउट गराए । आज मात्र ज्याकले टी-ट्वान्टी आई डेब्यु गरेका थिए ।
नेपालले पहिलो विकेटका रुपमा ओपनर आशिफ शेखलाई दोस्रो ओभरको पहिलो बलमा गुमाएको थियो । शेख बेन सिकोन्गोको बलमा बोल्ड आउट भएका थिए ।
नामिबियाका लागि बेन सिकोन्गोले ३ तथा ज्याक ब्रासेलले २ विकेट लिए । नेपालले अन्तिम ५ ओभरमा ४४ रन बनाउँदा ४ विकेट गुमायो । फाइनल सम्भावना कायमै राख्न नेपाललाई यो खेलमा जित्नै पर्ने हुन्छ ।
