काठमाडौं । एसीसी मेन्स प्रिमियर कपको पहिलो खेलमा मलेसियालाई हराउँदै नेपालले प्रतियोगिताको सुखद सुरुआत गरेको छ ।
ओमानको मस्कटमा भएको खेलमा नेपाल ५ विकेटले विजयी भयो ।
मलेसियाले दिएको १ सय ४४ रनको लक्ष्य नेपालले १९ दशमलब २ ओभरमा ५ विकेट गुमाएर पुरा गर्यो ।
नेपालका लागि ओपनर आसिफ शेखले ३५ बलमा ४ चौकाको सहयोगमा ३२ रन बनाए । कप्तान रोहितकुमार पौडेलले २४ बलमा १ छक्काको सहयोगमा २८ रन बनाए । दीपेन्द्रसिंह ऐरीले ११ बलमा २ चौका र १ छक्काको सहयोगमा २० रन बनाए । चौथो विकेटका लागि पौडेल र ऐरीले राम्रो साझेदारी भए पनि १७ औं ओभरमा दुवै ब्याटर गुमाएको नेपाल समस्यामा परेको थियो ।
त्यसपछि क्रिजमा आएका सन्दीप जोरा र गुलसन झाको ३० रनकाे अविजित साझेदारीले नेपाललाई जितसम्म पुर्यायो । झाले ७ बलमा १ चौका र २ छक्काको सहयोगमा अविजित १९ रन बनाए । जोराले ९ बलमा अविजित १२ रन बनाए ।
मलेसियाका लागि कप्तान विरनदिप सिंहले तीन विकेट लिए ।
त्यसअघि टस जितेर पहिले ब्याटिङ गरेको मलेसियाले निर्धारित २० ओभरमा ३ विकेट गुमाएर १ सय ४३ रन बनाएको थियो ।
मलेसियाका लागि कप्तान तथा ओपनर विरनदिप सिंहले ५५ बलमा ३ चौका र ४ छक्काको सहयोगमा अविजित ६८ रनको अर्धशतकीय ईनिङ खेले । सर्बिन मुनियान्डिले ३३ बलमा ३ चौका र २ छक्काको सहयोगमा ४१ रन बनाए । दोस्रो विकेटका लागि सिंह र मुनियान्डिले ८२ रनको महत्वपुर्ण साझेदारी गरे ।
ओपनर मोहम्मद अमिर १८ बलमा ३ चौकाको सहयोगमा १६ रन बनाउँदै दीपेन्द्रसिंह ऐरीको बलमा आउट भए । साइद अजिज ६ रन बनाउँदै ऐरीकै बलमा आउट भए ।
नेपालका लागि दीपेन्द्रसिंह ऐरीले दुई तथा अभिनास बोहोराले एक विकेट लिए ।
प्रिमियर कपमा आयोजक ओमान, नेपाल, मलेसिया, हङकङ, युएई, बहराइन, कतार कुवेत, कम्बोडिया र साउदी अरेबिया सहभागी रहेका छन् ।
प्रतियोगितामा सहभागी दश राष्ट्रलाई दुई समूहमा विभाजन गरएिको छ । नेपाल समूह ए मा रहेको छ । नेपाल रहेको समूहमा मलेसिया, हङकङ, साउदी अरेबिया र कतार छन् ।
समूह बी मा आयोजक ओमानसहित युएई, कुवेत, कम्बोडिया र बहराइन छन् ।
प्रतियोगितामा नेपालको दोस्रो खेल बैशाख १ मा कतारसँग रहेको छ । दोस्रो खेल नेपाली समय अनुसार अपरान्ह सवा ४ मा हुनेछ । नेपालले तेस्रो खेलमा बैशाख ३ मा हङकङसँग खेल्नेछ । यो खेल भने नेपाली समय अनुसार बिहान पौने १२ मा हुनेछ ।
समूह चरणको अन्तिम खेलमा नेपालले बैशाख ५ मा साउदी अरेबियासँग खेल्ने छ । यो खेल नेपाली समय अनुसार बिहान पौने १२ मा हुनेछ ।
हरेक समूहका शीर्ष २ टोली सेमिफाइनलमा प्रवेश गर्नेछन् । प्रिमियर कपको विजेता टोलीले एसिया कपमा स्थान बनाउनेछन् । यस संस्करणको एसिया कप टी-२० फर्म्याटमा हुनेछ ।
