काठमाडौं । पूर्व कप्तान रुबिना क्षेत्रीको सानदार शतकको सहयोगमा मलेसियामा जारी एसीसी वुमेन्स प्रिमियर कपमा समूह डी को विजेता बन्दै नेपाल क्वाटरफाइनलमा प्रवेश गरेको छ ।
नेपालले माल्दिभ्सलाई २ सय १४ रनले पराजित गर्यो ।
पहिलो ईनिङमा ऐतिहासिक शतकको प्रहार गरेकी रुबिनाले दोस्रो ईनिङमा ३ दशमलब ५ ओभरमा २ रन खर्चिए। ३ विकेट लिईन् ।
नेपालले दिएको २ सय २८ रनको लक्ष्य पछ्याएको माल्दिभ्स १३ दशमलब ५ ओभरमा १३ रन बनाउँदै अल आउट भयो ।
माल्दिभ्सका कुनै पनि ब्याटरले दोहोरो अंकमा रन जोड्न सकेनन् । माल्दिभ्सका ६ खेलाडीले रनको खाता खोल्न सकेनन् ।
नेपालका लागि अस्मिना कर्माचार्यले चार तथा पुजा महतो र रुबिनाले समान तीन तीन विकेट लिईन् ।
त्यसअघि टस जितेर पहिले ब्याटिङ रोजेको नेपालले निर्धारित २० ओभरमा ४ विकेट गुमाएर २ सय २७ रन बनायो ।
रुबिनाले ५९ बलमा अविजित १ सय १८ रन बनाईन् । रुबिनाले ५४ बलमा १० चौका र ३ छक्काको सहयोगमा नेपाली टिमका लागि पहिलो शतक पूरा गरिन् । यस अघि सीता रानामगरले ८२ रनको अविजित ईनिङ नै नेपालका लागि बनेको सर्वाधिक रन थियो ।
पूजा महतोले ३६ बलमा ५९ रनको अर्धशतकीय ईनिङ खेलिन् । पाँचौ विकेटका लागि रुविना र पूजाको बीचमा १ सय ६६ रनको साझदारी भएको थियो ।
यो नै नेपालले बनाएको सर्वाधिक टिमको सर्वाधिक स्कोर समेत रहेको छ । यस अघि २०२१ मा कतारविरुद्ध १ सय ६४ रन बनाएको थियो ।
माल्दिभ्सका लागि शम्मा अलीले तीन तथा नाबा नसिमले एक विकेट हात पारे ।
नेपालले लगातार दुई खेलमा जित हासिल गरेर प्रतियोगिताको क्वाटरफाइनलमा आफ्नो स्थान सुरक्षित गरिसकेको थियो । आजको खेलमा माल्दिभ्सलाई पराजित गरेसँगै नेपाल आफ्नो समूहको विजेता बन्दै क्वाटरफाइनलमा प्रवेश गरेको छ ।
समूह विजेता बनेसँगै नेपालले क्वाटरफाइनलमा समूह ए को उपविजेता कुवेतसँग बुधबार खेल्ने छ । नेपालले यसअघि पहिलो खेलमा हङकङलाई तथा दोस्रो खेलमा भुटानमाथि समान आठ आठ विकेटको जित हासिल गरेको थियो ।
हरेक समूहका शीर्ष दुई टोलीले क्वाटरफाइनलमा स्थान बनाउने छन् । प्रतियोगिताको फाइनल पुग्ने दुई टोलीले एसिया कपमा स्थान बनाउँने छन् ।
