काठमाडौं । कप्तान रोहित पौडेल र अलराउण्डर दीपेन्द्रसिंह ऐरीको अर्धशतकका बाबजुद नेदरल्यान्ड्सले नेपाललाई पराजित गरेको छ ।
टियु क्रिकेट मैदान कीर्तिपुरमा भएको खेलमा नेपाल २ रनले पराजित भयो ।
नेदरल्यान्ड्सले दिएको १ सय ८५ रनको लक्ष्य पछ्याएको नेपालले निर्धारित २० ओभरमा ८ विकेट गुमाएर १ सय ८२ रन बनायो ।
नेपालका लागि कप्तान रोहितकुमार पौडेलले ३६ बलमा ६ चौका र २ छक्काको सहयोगमा ५० रन बनाए । करियरको छैटौं अर्धशतक पौडेलले ३५ बलमा पूरा गरेका थिए । अर्धशतक पूरा गरे लगत्तै पौडेल सिब्रान्ड इंगेलब्रेक्टले बलमा आउट भए । दोस्रो विकेटका लागि पौडेल र ओपनर आशिफ शेखबीच ६५ रनको साझेदारी भएको थियो । शेख २३ बलमा ३४ रन बनाउँदै आउट भए ।
दीपेन्द्रसिंह ऐरीले ३४ बलमा ६ चौका र ३ छक्काको सहयोगमा ६३ रनको अर्धशतकीय ईनिङ खेले । करियरको आठौं अर्धशतक ऐरीले २८ बलमा पूरा गरे । करण केसी ७ बलमा ११ रनमा बनाए ।
कुशल मल्लले ११ बलमा ११ रन बनाए । ओपनर माईकल लेभेन्टको अर्धशतकको सहयोगमा नेदरल्यान्ड्सले जितका लागि नेपाललाई १ सय ८५ रनको लक्ष्य दिएको छ ।
त्यसअघि टस हारेर पहिले ब्याटिङ गरेको नेदरल्यान्ड्सले निर्धारित २० ओभरमा ४ विकेट गुमाएर १ सय ८४ रन बनाएको थियो ।
नेदरल्यान्ड्सका लागि ओपनर माइकल लिभेन्टले ३६ बलमा ५ चौका र ३ छक्काको सहयोगमा ५४ रनको अर्धशतकीय ईनिङ खेले । यसै खेलमा टीट्वान्टी आईमा डेब्यु गरेका उनले ३१ बलमा आफ्नो अर्धशतक पुरा गरेका थिए । डेब्यु खेलमा नै अर्धशतक बनाएका लिभेन्ट नवौं ओभरको पाँचौ बलमा कुशल मल्लको बलमा आउट भए ।
सिब्रान्ड इंगेलब्रेक्टले बलमा रन बनाए । उनले ४ चौका र १ छक्का प्रहार गरे । ३८ बलको सामना गरेका उनी अविजित रहे । कप्तान स्कट एडवार्डले १३ औं ओभरको अन्तिम बलमा आउट हुनु अघि ३३ रन बनाए । १६ बलको सामना गरेका उनले ५ चौका प्रहार गरेका थिए । तेजा निदामानुरुले २४ बलमा ३ चौकाको सहयोगमा ३१ रन बनाए ।
नेपालका लागि करण केसी र कुशल मल्लले समान १ विकेट लिए ।
नेपालले जुनमा हुने टी-ट्वान्टी विश्वकपको तयारीको सुरुआतको रुपमा यो सिरिजलाई लिएको छ । नामिबिया र नेदरल्यान्ड्स पनि विश्वकप खेल्दैछन् । विश्वकपमा नेपाल र नेदरल्यान्ड्स एकै समूहमा छन् ।
हारसँगै नेपालले फाइनल सम्भावना कठिन बनेको छ ।
