काठमाडौं । ओपनर माईकल लिभेन्टको शतकमा नेदरल्यान्ड्सले नामिबियालाई सहज रुपले पराजित गरेको छ ।
टियु मैदानमा भएको खेलमा नामिबिया ५९ रनले पराजित भयो ।
नेदरल्यान्ड्सले दिएको २ सय ४७ रनको लक्ष्य पछ्याएको नामिबियाले निर्धारित २० ओभरमा ७ विकेट गुमाएर १ सय ८८ रन मात्र बनायो ।
नामिबियाका लागि जान फ्रायलिंक र जानी ग्रीनले समान ४२ तथा जेपी कोट्जेले २६ रन बनाए ।
त्यसअघि टस जितेर ब्याटिङ रोजेको नेदरल्यान्ड्सले निर्धारित २० ओभरमा ५ विकेट गुमाएर २ सय ४७ रन बनाएको थियो ।
नेदरल्यान्ड्सका लागि ओपनर माईकल लिभेन्टले ६२ बलमा ११ चौका र १० छक्काको सहयोगमा १ सय ३५ रनको शतकीय ईनिङ खेले । करियरको दोस्रो टी-ट्वान्टी आईमा उनले ४९ बलमा शतक पूरा गरे । शतक बनाएका लिभेन्ट १८ औं ओभरको दास्रो बलमा लफ्टि इटनबाट क्याच आउट भए ।
दोस्रो विकेटका लागि लिभेन्ट र साईब्रान्ड एन्गलब्रेटले ८७ बलमा १ सय ९३ रनको साझेदारी गरे । साईब्रान्डले ४० बलमा ७ चौका र ५ छक्काको सहयोगमा ७५ रनको अर्धशतकीय ईनिङ खेले । तेजा निदामानिरु ३ बलमा १८ रन बनाए ।
नामिबियाका लागि रुवेन ट्रम्पलम्यानले २ तथा बेन सिकान्गो र जाय फ्रयलिंकले समान १ विकेट लिए ।
लगातार दुई जीतका साथ नेदरल्यान्ड्सले फाइनल सम्भावना बलियो बनाएको छ ।