काठमाडौं । दाङको घोराहीमा जारि नेपाल टेलिकम दाङ क्रिकेट लिग(डिसिएल) अन्तर्गत मंगलबार सम्पन्न खेलमा तुलसीपुर रोयल्स र घोराही टाइगर्स विजयी भएका छन्।
घोराही क्रिकेट स्टेडियममा सम्पन्न खेलमा तुलसीपुर रोयल्सले दंगाली लायन्सलाई तथा डिफेन्डिङ च्याम्पियन समेत रहेको घोराही टाइगर्सले पुरनधारा च्यालेन्जर्सलाई पराजित गर्यो।
आजको पहिलो खेलमा तुलसीपुर रोयल्सले विजयी सुरुवात गर्ने क्रममा दंगाली लायन्सलाई २७ रनले पराजित गर्यो। तुलसीपुर रोयल्सले दिएको १२६ रनको लक्ष्य पछ्याएको दंगाली लायन्सले २० ओभरमा सबै विकेट गुमाएर ९८ रन मात्र बनाउन सक्यो।
लक्ष्य पछ्याउने क्रममा दंगाली लायन्सको लागि ओपनर सन्तोष कार्कीले सर्वाधिक ३१ रन योगदान दिए। अर्का ओपनर अंकित बुढा मगरले १६ तथा बिपिन खत्रीले १२ रन बनाउनु बाहेक अन्य ब्याटरले दोहोरो अंकमा रन बनाउन सकेनन्।
तुलसीपुर रोयल्सको बलिंगमा प्लेयर अफ द म्याच घोषित दायाँ हाते फास्ट बलर अमर सिंह रौटेलाले सर्वाधिक ३ विकेट लिए । उनले ४ ओभरमा २२ रन खर्चिए। इस्माईल अन्सारीले ३ विकेट लिंदा दिवान पुनले २ तथा रुपेश सिंहले १ विकेट लिए।
त्यसअघि टस हारेर ब्याटिंग गरेको तुलसीपुर रोयल्सले २० ओभरमा ४ विकेट गुमाएर १२५ रन बनायो। तुलसीपुरको लागि ओपनर बिपिन रावलले सर्वाधिक ४२ रन बनाए। अन्डर-१९ राष्ट्रिय क्रिकेटर समेत रहेका रावलले ४५ बलमा ३ चौका र १ छक्का प्रहार गरे। अर्का ओपनर बिराट सिंह भण्डारीले ३८ रन बनाए जुन क्रममा ५७ बलमा १ चौका र १ छक्का प्रहार गरे। बिपिन र बिराटले ९५ रनको ओपनिंग साझेदारी गरे।
दंगाली लायन्सको बलिंगमा बिपिन खत्री, बसिर अहमद र प्रकाश जैसीले १/१ विकेट लिए।
आजको दोश्रो खेलमा घोराही टाइगर्सले पुरनधारा च्यालेन्जर्सलाई पराजित गर्दै पहिलो जित दर्ता गर्यो।
पुरनधारा च्यालेन्जर्सले दिएको ११८ रनको लक्ष्य घोराही टाइगर्सले १९ दशमलब ४ ओभरमा ८ विकेट गुमाएर पुरा गर्यो। लक्ष्य पछ्याउने क्रममा घोराहीको लागि अर्जुन घर्तिले सर्वाधिक ४१ रन योगदान दिए जुन क्रममा ३३ बलमा ३ चौका र २ छक्का प्रहार गरे। यस्तै दिपेश कंडेलले १९, दिल्शाद अलिले १५, दिलिप नाथले १० तथा युनिश विक्रम सिंहले ९ रनको योगदान दिए। ५२ रनमा ४ विकेट गएको अवस्थामा दिपेश कंडेल र अर्जुन घर्तिले ४२ रनको महत्वपूर्ण साझेदारी गरेका थिए।
पुरनधाराको बलिंगमा कृष्ण कार्की, दिपेन्द्र रावत र सुजल ओलीले २/२ विकेट लिए तापनि जितको लागि पर्याप्त हुन सकेन।
त्यसअघि टस हारेर ब्याटिंग गरको पुरनधाराले २० ओभरमा ८ विकेट गुमाएर ११७ रन बनायो। पुरनधाराको लागि राजु रिजालले अर्धशतकीय योगदान दिए। राष्ट्रिय क्रिकेटर समेत रहेका रिजालले ४४ बलमा ५ चौका र १ छक्का प्रहार गरे। रित गौतमले १६, दिपेन्द्र रावतले १५ तथा प्रनित थापाले १० रन बनाए।
घोराही टाइगर्सको बलिंगमा दिपेश कंडेलले सर्वाधिक ३ विकेट लिए। खेलको प्लेयर अफ द म्याच समेत घोषित यु-१९ राष्ट्रिय टिमका सदस्य समेत रहेका दिपेश कंडेलले ४ ओभरमा १२ रन मात्र खर्चिए। मिलन बुढाथोकीले २ तथा युनिश विक्रम सिंह र अर्जुन घर्तिले १/१ विकेट लिए।
प्रतियोगिता अन्तर्गत तेश्रो दिन बुधबार पनि दुई खेल हुनेछन्। पहिलो खेल विहान ९ः३० बजे तुलसीपुर रोयल्स र पुरनधारा च्यालेन्जर्स बीच तथा दोश्रो खेल दिउँसो १ः३० बजे घोराही टाइगर्स र देउखुरी वारियर्सबीच हुनेछ।
प्रतियोगितामा पाँच फ्रेन्चाईज टोली सहभागी छन् । जसमा सुशान्त सिंह थापा कप्तान रहेको घोराही टाइगर्स, विशाल विक्रम केसी कप्तान रहेको देउखुरी वारियर्स, मोहन खत्री कप्तान रहेको पुरन्धारा च्यालेन्जर्स, दिवान पुन कप्तान रहेको तुलसीपुर रोयल्स तथा विपिन खत्री कप्तान रहेको दंगाली लायन्स रहेका छन्। राउण्ड रोबिन फर्म्याटमा भइरहेको प्रतियोगिता फागुन १९ गते सम्म संचालन हुनेछ।
