मलेसियामा जारि एसीसी अन्डर-१९ इस्टर्न प्रतियोगिताको उपाधिको लागि नेपालले हंगकंगको सामना गर्दैछ।
प्रतियोगिता अन्तर्गत सेमीफाइनलमा नेपालले आयोजक मलेसियालाई ७ विकेटले तथा हंगकंगले सिंगापुरलाई ५१ रनले (डीएल मेथड ) पराजित गर्दै फाइनलमा स्थान बनाएको हो। फाइनल खेल किनरारा ओभल मैदानमा मंगलबार बिहान ७:४५ बजे ( नेपाली समय ), हंगकंग समय १० बजे बिहान सुरु हुनेछ।
समुह चरणमा नेपालले चिन र सिंगापुरलाई सहजै पराजित गर्दै सेमीफाइनलमा समुह ‘ए’ को विजेताको रुपमा सेमीफाइनल प्रवेश गरेको थियो। नेपालले चिनलाई १० विकेटले र सिंगापुरलाई २१७ रनले पराजित। यस्तै समुह चरणमा हंगकंगले मलेसियालाई ३ रनले, भुटानलाई १७० रनले तथा थाईल्याण्डले ५ विकेटले पराजित गर्दै समुह ‘बि’ को विजेताको रुपमा सेमीफाइनल प्रवेश गरेको थियो।
एसीसी अन्डर-१९ प्रतियोगिताको २०१७ को संस्करण नेपालले फाइनलमा हंगकंगलाई पराजित गर्दै जितेको थियो। प्रतियोगिता जित्ने टिमले २८ अगस्ट देखि श्रीलंकामा आयोजना हुने अन्डर-१९ एसिया कप खेल्न छनौट हुनेछ। यस्तै नेपाल र हंगकंग २०२० नोभेम्माबर युएईमा आयोजना हुने यु-१९ एसिया कप खेल्न छनौट भइसकेका छन्।
फाइनल खेलमा नेपालको लागि खतरनाक सावित हुन सक्ने ४ हंगकंग खेलाडी
अदित गोरवारा :
हंगकंगका अदित गोरवाराको वर्तमान लयले नेपाललाई फाइनल खेलमा चुनौती प्रस्तुत गर्नसक्छ। जारि प्रतियोगिताको ४ खेलमा अदितले ६५.३३ को सानदार औसतमा १९६ रन जोडिसकेका छन् र प्रतियोगिताकै सर्वाधिक रन बनाउने ब्याट्सम्यान समेत हुन्। टोलीको कप्तन समेत रहेका अदितले सिङ्गापुर बिरुद्ध ५२ रन, मलेसिया बिरुद्ध ५० रन, भुटान बिरुद्ध अविजित ८४ रन र थाइल्याण्ड बिरुद्ध १० रन बनाएका थिए। लगातार रन बनाएका अदितसंग नेपालले साबधानी अपनाउनु पर्नेछ।
मोहम्मद हसन :
प्रतियोगतामा नेपालको ब्याटिंग लाइनको अप धेरै परिक्षण भएको छैन। सो अवस्थामा बायाँ हाते स्पिनर मोहम्मद हसन नेपालका लागि घातक बन्न सक्छन्। हसनले प्रतियोगिताका ४ खेलमा ७ विकेट आफ्नो नाम गरेका छन् र धेरै विकेट लिने सुचीमा छैठौं स्थानमा रहेका छन्। हंगकंगको बलिङ्ग युनिटका महत्वपूर्ण सदस्य रहेका हसनले ३१ ओभर बलिङ्ग गर्दा ११ को औसत तथा २.४८ को इकोनोमीमा ७ विकेट लिएका हुन्। उनले सिंगापुर बिरुद्ध सेमीफाइनलमा र भुटानसंग समुह चरणमा समान ३/३ विकेट लिएका थिए।
नसरुल्ला राना :
हंगकंगले प्रतियोगितामा फाइनलसम्म को यात्रा तय गर्नमा नसरुल्ला रानाको अलराउण्ड प्रदर्शनको ठूलो भूमिका रहेको छ। दायाँ हाते ब्याट्सम्यान र दायाँ हाते मिडियम पेसर रानाले ४ खेलमा ५ विकेट चट्काएका छन् भने १८१ रन समेत जोडेका छन्। उनि प्रतियोगिताकै दोश्रो सर्वाधिक रनकर्ता समेत हुन्। टोलीको ब्याटिंग युनिटमा ओपनिङ्ग ब्याटिंग गर्दै बिष्फोटक ब्याट्सम्यानका रुपमा भूमिका निभाउंदै आएका रानाले १६१.६१ को स्ट्राइक रेटमा रन जोडेका छन्। सिंगापुर बिरुद्धको खेलमा उनले मात्र २८ बलमा ५५ रन जोडेका थिए। यस्तै भुटान बिरुद्ध ३० बलमा ५० रन र थाइल्याण्ड बिरुद्ध समेत २६ बलमा ४६ रन जोडेका थिए।
रौनक कपुर :
हंगकंग टोलीका अर्का प्रतिभाशाली स्पिनर रौनक कपुरको प्रदर्शन समेत यस प्रतियोगितामा उत्कृस्ट रहँदै आएको छ। रौनकले मलेसियासंग ३ विकेट तथा थाईल्याण्ड बिरुद्ध ५ विकेट लिएका थिए। दायाँ हाते अफ स्पिनर कपुरले ३ खेलमा ९ विकेट आफ्नो नाम गरेका छन् र धेरै विकेट लिने सुचीमा तेश्रो स्थानमा रहेका छन्। प्रतियोगितामा २१.३ ओभर बलिङ्ग गरेका उनले ६.११ को औसत तथा २.५६ को इकोनोमीमा ९ विकेट हात पारेका हुन्। नेपालको ब्याटिंगलाई सस्तैमा समेट्न रौनकको भूमिका महत्वपूर्ण रहने छ।
