काठमाडौं । पूर्व कप्तान रुबिना क्षेत्रीको ऐतिहासिक शतकको सहयोगमा नेपालले माल्दिभ्सलाई २ सय २८ रनको लक्ष्य दिएको छ ।
मलेसियामा जारी एसीसी वुमेन्स प्रिमियर कपमा रुबिनाले ऐतिहासिक शतक प्रहार गरेकी हुन् ।
टस जितेर पहिले ब्याटिङ रोजेको नेपालले निर्धारित २० ओभरमा ४ विकेट गुमाएर २ सय २७ रन बनायो ।
रुबिनाले ५९ बलमा अविजित १ सय १८ रन बनाईन् । रुबिनाले ५४ बलमा १० चौका र ३ छक्काको सहयोगमा नेपाली टिमका लागि पहिलो शतक पूरा गरिन् । यस अघि सीता रानामगरले ८२ रनको अविजित ईनिङ नै नेपालका लागि बनेको सर्वाधिक रन थियो ।
पूजा महतोले ३६ बलमा ५९ रनको अर्धशतकीय ईनिङ खेलिन् । पाँचौ विकेटका लागि रुविना र पूजाको बीचमा १ सय ६६ रनको साझदारी भएको थियो ।
यो नै नेपालले बनाएको सर्वाधिक टिमको सर्वाधिक स्कोर समेत रहेको छ । यस अघि २०२१ मा कतारविरुद्ध १ सय ६४ रन बनाएको थियो ।
माल्दिभ्सका लागि शम्मा अलीले तीन तथा नाबा नसिमले एक विकेट हात पारे ।
नेपालले लगातार दुई खेलमा जित हासिल गरेर प्रतियोगिताको क्वाटरफाइनलमा आफ्नो स्थान सुरक्षित गरिसकेको छ । आजको खेलमा माल्भ्सिलाई पराजित गर्दै नेपाल आफ्नो समूहको विजेता बन्दै क्वाटरफाइनलमा प्रवेश गर्न चाहन्छ ।
समूह विजेता बनेमा नेपालले क्वाटरफाइनलमा समूह ए को उपविजेतासँग खेल्ने छ । यस अघिका दुवै खेलमा पराजित माल्दिभ्स भने प्रतियोगिताबाट बाहिरिएको छ ।
नेपालले यसअघि पहिलो खेलमा हङकङलाई तथा दोस्रो खेलमा भुटानमाथि समान आठ आठ विकेटको जित हासिल गरेको थियो ।
हरेक समूहका शीर्ष दुई टोलीले क्वाटरफाइनलमा स्थान बनाउने छन् । प्रतियोगिताको फाइनल पुग्ने दुई टोलीले एसिया कपमा स्थान बनाउँने छन् ।