काठमाडौं । अफ्रिकी मुलुक दक्षिण अफ्रिका, जिम्बावे र नामिबियामा संयुक्त रुपमा आयोजना हुने २०२७ को एकदिवसीय विश्वकपको छनोटको रुपमा रहेको आईसीसी विश्वकप लिग टू अन्तर्गत नेपाल, नामिबिया र नेदरल्याण्ड्स सम्मिलित त्रिकोणात्मक सिरिजमा नेपालले दोस्रो खेलमा शनिबार खेल्दै छ ।
यस नेपाल सिरिजको दोस्रो खेलमा घरेलु टोली नेपाल र नेदरल्याण्ड्स खेल्दै छन् । खेल शनिबार बिहान सवा ९ बजेबाट टियु मैदान किर्तिपुरमा आयोजना हुदैछ । विश्वकप लिग टू मा नेपाल र नेदरल्यान्ड्स पहिलो पटक खेल्दै छन् । एकदिवसीय अन्तराष्ट्रिय (ओडिआई) मा भने नेपाल र नेदरल्यान्डबीच खेल भईसकेको छ ।
हालसम्म नेपाल र नेदरल्यान्डबीचमा तीन ओडिआई खेल भएको छ । तीन मध्ये दुई खेलमा नेदरल्यान्ड्स र एक खेलमा नेपाल विजयी भएको छ ।
नेपाल र नेदरल्यान्ड्सबीचको पहिलो खेल नेदरल्यान्ड्स र नेपालको दुई एकदिवसीय खेलको सिरिजमा भएको थियो । पहिलो भेट २०१८ अगस्ट १ मा भएको थियो । यो भेट नेपालका लागि ऐतिहासिक रहेको थियो । यो खेल नै नेपाली क्रिकेटमा ओडिआई मान्यता प्राप्त पहिलो खेल रहेको थियो । तर, सो ऐतिहासिक खेल नेपालले गुमाएको थियो ।
सो खेल नेदरल्यान्ड्सले ५५ रनले जितेको थियो । खेलमा टस जितेर घरेलु टोली नेदरल्यान्ड्सले पहिले ब्याटिङ गरेको थियो । माईकल रिप्पोनको अर्धशतकको सहयोगमा नेदरल्यान्ड्स ४७ दशमलब ४ ओभरमा १ सय ८९ रनमा अलआउट भएको थियो ।
नेपालका लागि तत्कालिन कप्तान पारस खड्काले ४ तथा तीव्र गतिका बलर सोमपाल कामीले ३ विकेट लिएका थिए । नेदरल्यान्ड्सका लागि रिप्पोनले ७६ बलमा ५१ तथा बस डि लिडले ६० बलमा ३० रन बनाएका थिए ।
१ सय ९० रनको लक्ष्य पछ्याएको नेपाल ४१ दशमलब ५ ओभरमा १ सय ३४ रनमा अलआउट भएको थियो । ज्ञानेन्द्र मल्लले ओडिआई क्रिकेटमा नै नेपालका पहिलो अर्धशतक बनाएका थिए । मल्लले ६१ बलमा ५१ रन बनाउँदा दीपेन्द्रसिंह ऐरीले ४८ बलमा ३३ रन बनाएका थिए । नेदरल्यान्ड्सका लागि पिटर सिलर र माईकल रिप्पोनले समान ३र३ विकेट लिएका थिए ।
नेपाल र नेदरल्यान्ड्सबीच सोहि सिरिजको दोस्रो खेलमा नेपालको दोस्रो भेट भएको थियो । यस खेल नेपालले १ रनले रोमान्चक तबरले जितेको थियो । टस जितेर नेपालले ब्याटिङ रोजेको थियो । तत्कालिन कप्तान पारस खड्का र सोमपाल कामीको अर्धशतकको सहयोगमा नेपाल ४८ दशमलब ५ ओभरमा २ सय १६ रनमा अलआउट भएको थियो ।
नेपालका लागि सोमपाल कामीले ४६ बलमा ७१ तथा कप्तान खड्काले ६९ बलमा ५१ रन बनाएका थिए । नेदरल्यान्ड्सका लागि फ्रेड क्लेसनले ३ तथा माईकल रिप्पोनले २ विकेट लिएका थिए ।
२ सय १७ रनको लक्ष्य पछ्याएको नेदरल्यान्ड्स निर्धारित ५० ओभरका अन्तिम बलमा २ सय १७ रनमा अलआउट भएको थियो । नेपालका लागि सन्दीप लामिछानेले ३ तथा ललित भन्डारीले २ विकेट लिएका थिए । नेदरल्यान्ड्सका लागि वेस्ले बेरेसीले ८९ बलमा ७१ तथा डानियल टेर ब्राकले ८३ बलमा ३९ रन बनाएका थिए ।
नेपाल र नेदरल्यान्ड्सको तेस्रो तथा पछिल्लो भेट अघिल्लो वर्ष जिम्बावेमा आयोजना भएको विश्वकप छनोटमा भएको थियो । यो खेल नेदरल्यान्ड्सले सात विकेटले जितेको थियो । पहिले ब्याटिङ गरेको नेपाल १ सय ६७ रनमा अल आउट भएको थियो । सो खेलमा कप्तान रोहितकुमार पौडेलले ५५ बलमा ३३ तथा सन्दीप लामिछानेले ३३ बलमा २५ रन बनाएका थिए । नेदरल्यान्ड्सका लगन भान बिकले चार तथा बास डि लिडेले दुई विकेट लिएका थिए ।
१ सय ६८ रनको लक्ष्य नेदरल्यान्ड्सले २७ दशमलब १ ओभरमा ३ विकेट गुमाएर पूरा गरेको थियो । नेपालका लागि सन्दीप लामिछानेले दुई तथा गुलसन झाले एक विकेट लिएका थिए । नेदरल्यान्ड्सका लागि म्याक्स ओ डाउनले ७५ बलमा ९० तथा बास डि लिडेले ३९ बलमा अविजित ४१ रन बनाएका थिए ।
नेपालको घरेलु भुमीमा भने नेपाल र नेदरल्याड्स ओडिआई खेलमा पहिलो पटक भिड्न लागेका हुन् । त्यसैले यस खेललाई नेपाल ऐतिहासिक बनाउँन चाहन्छ ।
