काठमाडौं । विश्वकप लिग टू अन्तर्गतको जारी त्रिकोणात्मक सिरिजमा नेदरल्यान्ड्सलाइ नामिबियाले जितका लागि २ सय ४ रनको लक्ष्य दिएको छ ।
टियु क्रिकेट मैदान कीर्तिपुरमा टस हारेर पहिले ब्याटिङ गरेको नामिबियाले ४२ औं ओभरको तेस्रो बलमा अल आउट हुदै २ सय ३ रन मात्र बनायो ।
नामिबियाका लागि जेन निकोलले ४३ बलमा ६ चौका र २ छक्काको सहयोगमा ४९ रन बनाए । अर्धशतक बनाउँन १ रनले चुकेका जेन रन आउट भएका थिए । यसै खेलमा डेब्यु गरेका मलान कुरुगरले ४८ बलमा ३५ रन बनाए ।
आर्यान दत्तको बलमा आउट हुनुपुर्व मलानले ५ चौका प्रहार गरेका थिए । जेन फ्रायलिंकले ५७ बलमा ३४ रन बनाए । छैटौं विकेटका लागि निकोल र फ्रायलिंकले ७८ रनको साझेदारी गरेका थिए ।
जान ग्रिनले २० बलमा २२ रन बनाए । नेदरल्यान्ड्सका लागि भिभियन किंग्मा ३ तथा आर्यान दत्त र रिलोफ भान डर मिरोले समान २/२ विकेट लिए । बास डि लिडे र शिराज अहमदले समान १/१ विकेट लिए ।
बिहिबारको वर्षाका कारण टस ढिला भएको थियो । खेल साढे १० मा सुरु भएको खेल ४५ ओभरमा छोट्याएको थियो ।
