काठमाडौं । २०२७ मा दक्षिण अफ्रिका, जिम्बावे र नामिबियामा आयोजना हुने ओडिआई विश्वकपको छनोटको रुपमा रहेको विश्वकप लिग टू अन्तर्गतको पहिलो त्रिकोणत्मक सिरिज नेपालमा जारी छ ।
सिरिजमा नेपाल, नामिबिया र नेदरल्यान्ड्सको सहभागीता रहनेछ । सिरिजमा हरेक टोली हरेकसँग दुई खेल खेल्नेछन् । यस त्रिकोणात्मक सिरिजको अन्तिम तथा छैटौं खेलमा नेपालले आईतबार नेदरल्यान्ड्ससँग खेल्दैछ ।
आठ राष्ट्रको सहभागीता रहने लिग टू सिरिजका शीर्ष चार टोलीले सिधै विश्वकप छनोट स्थान बनाउँने भएकोले यो खेल नेपालका लागि महत्वपुर्ण छ । नेदरल्यान्ड्सलाई गत साता मात्र पहिलो पटक नेपालले घरेलु मैदानमा पराजित गरेको थियो ।
घरेलु भुमीमा नेदरल्यान्ड्सविरुद्ध नेपाल लगातार दोस्रो जित निकाल्न चाहन्छ । यसका लागि नेपालले बलियो प्लेईङ११ मैदान उतार्ने सम्भावना रहेको छ । नामिबियाविरुद्धको बुधबारको खेलबाट नेपालले एक परिवर्तन गर्ने सम्भावना छ । आइतबारको खेलमा देव खनालको स्थानमा आरिफ शेखले मौका पाउने सम्भावना छ ।नेपालको सम्भावित प्लेईङ-११ यसप्रकारको हुनसक्छ :
नेपालका ओपनरमा कुशल भुर्तेल र आसिफ शेखले यस खेलमा पनि निरन्तरता पाउने सम्भावना रहेको छ । कुशलको आक्रामक सुरुआत र आसिफको सुझबुझपुर्ण ब्याटिङको अपेक्षा टोलीलाई रहनेछ । नामिबियाविरुद्धको खेलमा आशिफ दुवै ओपनरबाट सोचे अनुरुपको प्रदर्शन नभएकाले यस खेलमा राम्रो सुरुआतको अपेक्षा छ ।
तेस्रो नम्बरमा अनिल शाहले निरन्तरता पाउने सम्भावना छ । शाहको आक्रामक ब्याटिङको अपेक्षा गरिएको छ । सिरिजमा अपेक्षा अनुरुपको प्रदर्शन गर्न नसकेका शाहले आइतबारको खेलमा आफ्नो आक्रामक खेल देखाउने अपेक्षा छ । चौथो नम्बरमा भीम सार्कीले अवसर पाउने सम्भावना रहेको छ । भीमको क्रिजमा टिकेर रहने क्षमताको हरेक तर्फबाट तारिफ हुदै आएको छ ।
पाँचौ नम्बरमा कप्तान रोहितकुमार पौडेलले आफ्नो स्थान बनाउँन सक्नेछन् । नेपालको ओडिआई ईतिहासका सर्वाधिक सफल ब्याटर पौडेलबाट केही ओभर बलिङको समेत आवश्यकता देखिन्छ । सिरिजमा खास चल्न नसकेका पौडेलबाट आइतबारको खेलमा रन आउने अपेक्षा राख्न सकिन्छ ।
नेपालका लागि छैटौं नम्बरमा नेपालका नम्बर वान अलराउण्डर दीपेन्द्रसिंह ऐरीको सम्भावना रहेको छ । बुधबार भएको नामिबियाविरुद्धको खेल ऐरीको प्रदर्शन अपेक्षा अनुरुपको थिएन । आइतबारको खेलमा ब्याटिङ, बलिङ र फिल्डिङबाट टिमलाई ऐरीले भरपुर योगदान दिने अपेक्षा रहेको छ ।
सातौं नम्बरमा नेपाली ओडिआई क्रिकेटका खम्बा मानिने आरिफ शेखको सम्भावना रहेको छ । शेखले केही ओभर मिडियम पेस बलिङ समेत गर्न सक्छन् । शेखका धेरै महत्वपुर्ण ईनिङको सहयोगमा नेपाल हारबाट टाढा भएको छ । केही खेलबाट बेन्चमा राखेको नेपालले यस खेलमा भने उनलाई मौका दिने सम्भावना छ । आठौं नम्बरमा अलराउण्डर कुशल मल्ल रहने सम्भावना छ । लामो लामो हिटका लागि चिनिने मल्ल राम्रा फिनिसर समेत हुन् । केही ओभर स्पिन बलिङ गर्न सक्ने मल्लको क्षमता समेत रहेको छ ।
नवौं ननम्बरमा तिव्र गतिका अर्का बलर करण केसीले मौका पाउँने सम्भावना छ । पछिल्लो क्रमको ब्याटिङमा समेत केसीले योगदान दिनेछन् । दशौं नम्बरमा सोमपाल कामीले स्थान बनाउँने सम्भावना छ । तल्लो क्रममा रहेर राम्रो ब्याटिङको समेत क्षमता राख्ने कामीले फास्ट बलिङमा टोलीको नेतृत्व गर्ने छन् ।
नेपाली टोलीको एघारौं नम्बरमा देब्रे हाते स्पिनर ललितनारायण राजवंशी रहने सम्भावना रहेको छ । राजवंशीको राष्ट्रिय टोलीबाट यस अघि हुदै आएको प्रदर्शन हेर्दा उनी टोलीमा पर्ने सम्भावना रहेको छ ।
नेपालको सम्भावित प्लेईङ-११
आसिफ शेख(विकेटकिपर), कुशल भुर्तेल, अनिल शाह, भीम सार्की, रोहित पौडेल(कप्तान), दीपेन्द्रसिंह ऐरी, आरिफ शेख, कुशल मल्ल, सोमपाल कामी, करण केसी, ललितनारायण राजवंशी ।
