काठमाडौं । १७ औं संस्करणको इन्डियन प्रिमियर लिग(आइपीएल) को १९ औं खेलमा विराट कोहलीको शतकको बाबजुद रोयल च्यालेन्जर्स बेंगलुरु राजस्थान रोयल्ससँग पराजित भएको छ ।
घरेलु मैदान सवाईमान सिंह क्रिकेट स्टेडियममा पाँचौ खेलमा चौथो जित हात पार्ने क्रममा राजस्थान ६ विकेटले विजयी भयो ।
बेंगलुरुले दिएको १ सय ८४ रनको लक्ष्य घरेलु टोलीले १९ दशमलब १ ओभरमा ४ विकेट गुमाएर पूरा गर्यो ।
राजस्थानका लागि जोस बटलरले ५८ बलमा ९ चौका र ४ छक्काको सहयोगमा अविजित १ सय रनको शतकीय ईनिङ खेले । करियरको छैटौं आइपीएल शतक बटलरले ५८ बलमा पुरा गरेका थिए । आफ्नो एक सयौं आईपीएल खेलमा शतक प्रहार गर्ने बटलर दोस्रा खेलाडी हुन् । यस अघि केएल राहुलले यो सफलता प्राप्त गरेका थिए ।
कप्तान सन्जु सामसनले ४२ बलमा ८ चौका र २ छक्काको सहयोगमा ६९ रनको अर्धशतकीय ईनिङ खेले । । ओपनर यसश्वी जैसवाललाई पहिलो ओभरमा नै गुमाएको राजस्थानका लागि दोस्रो विकेटका लागि राम्रो साझदारी भएपछि टिम विजयीसम्म पुग्न सफल भयो ।
दोस्रो विकेटका लागि कप्तान सामसन र बटलरले १ सय ४८ रनको शतकीय साझेदारी भएको थियो । शिमरन हिटमायरले ६ बलमा २ चौकाको सहयोगमा अविजित ११ रन बनाए । रियान परागले ४ बलमा १ चौकाको सहयोगमा ४ रन बनाए ।
बेंगलुरुका लागि रिच टोप्लीले दुई तथा यस दयाल र मोहम्मद सिराजले समान एक एक सफलता दिलाएका थिए ।
त्यसअघि टस हारेर पहिले ब्याटिङ गरेको पाहुना टोलीले निर्धारित २० ओभरमा ३ विकेट गुमाएर १ सय ८३ रन बनाएको थियो ।
बेंगलुरुका लागि विराट कोहलीले ७२ बलमा १२ चौका र ४ छक्काको सहयोगमा अविजित १ सय १३ रनको शतकीय ईनिङ खेले । आइपीएल ईतिहासमा आफ्नो आठौं शतक कोहलीले ६७ बलमा पुरा गरेका थिए । यो सिजनको यो नै पहिलो शतक रहेको थियो । कोहलीको यो शतक आइपीएल ईतिहासकै सबैभन्दा धेरै बलमा बनेको शतक बन्न पुगेको थियो ।
कप्तान फाफ डु प्लेसिसले ३३ बलमा २ चौका र २ छक्काको सहयोगमा ४४ रन बनाए । पहिलो विकेटका लागि कोहली र फाफले १३ दशमलब ६ ओभरमा १ सय २५ रनको शतकीय साझेदारी गरे । तर, अन्य खेलाडीले दोहोरो अंकमा रन बनाउँन सकेनन् ।
ओपनरले दिलाएको सुरुआत अनुसार पछिल्ला क्रमका ब्याटर नचल्दा टोली २ सयको योगफल बनाउने ठूलो अवसरबाट पछि पर्यो । १५ औं ओभर पछि राजस्थानका बलरले राम्रो पुनरागमन गर्दै बेंगलुरुलाई ठूलो योगफल बन्न दिएन ।
राजस्थानका लागि युजभेन्द्र चहलले २ तथा नान्द्रे बर्गरले १ विकेट लिए ।
चौथो खेलमा अपराजित रहेको राजस्थान ८ अंकका साथ शीर्ष स्थानमा उक्लिएको छ । पाँचौ खेलमा चौथो हार व्यहोरेको बेंगलुरु पुछारबाट तेस्रो स्थानमा छ ।
