काठमाडौं । कप्तान मोहम्मद वासिमको शतकको सहयोगमा ओमानलाई पराजित गर्दै युएईले २०२५ को एसीया कपमा स्थान बनाएको छ ।
घरेलु टोली ओमानलाई आइतबार भएको एसीसी प्रिमियर कपको फाइनल खेलमा ओमानलाई ५५ रनले पराजित गर्दै युएईले उपाधि जितेको हो।
यूएईले दिएको २ सय ५ रनको लक्ष्य पछ्याएको ओमानले निर्धारित २० ओभरमा ८ विकेट गुमाउँदै १ सय ४७ रन मात्रै बनाउन सक्यो।
ओमानका लागि प्रतिक आठवलेले ३० बलमा ४ चौका र ३ छक्का सहित सर्वाधिक ४९ रन बनाए । खालिद कैल ३०, जिशान मक्सूद १४ र रफिउल्लाह ११ रनमा आउट हुँदा फैय्यज बट २३ रनमा अविजित रहे।
युएईका जुनैद सिद्दिकीले तीन तथा मोहम्मद फारुख र आयान अफजल खानले समान दुई दुई विकेट लिए ।
त्यसअघि टस हारेर पहिला ब्याटिङ गरेको युएईले निर्धारित २० ओभरमा ४ विकेट गुमाउँदै २ सय ४ रन बनाएको थियो ।
युएईका कप्तान वसिमले ५६ बलमा ६ चौका र ७ छक्काको सहयोगमा १०० रन बनाए । अलिशान शराफु ३४ र विष्णु सुकुमारन १८ रन बनाए ।
ओमानका बिलाल खानले दुई तथा शकील अहमद र जिशान मक्शूदको नाममा समान एक एक विकेट रह्यो।