काठमाडौं । दिल्ली क्यापिटल्सविरुद्ध जित दर्ता गर्दै रोयल च्यालेन्जर्स बेंगलूरुले लगातार पाँचौ जित निकालेको छ । यस जितसँगै बेंगलूरुले प्लेअफ सम्भावना कायम राखेको छ ।
घरेलु मैदानमा भएको खेलमा बेंगलूरुले ४७ रनको जित निकालेको हो ।
बेंगलूरुले दिएको १ सय ८८ रनको लक्ष्य पछ्याएको दिल्ली १९ दशमलब १ ओभरमा अल आउट हुँदै १ सय ४० रन मात्र जोड्न सक्यो ।
दिल्लीका लागि कप्तान अक्षर पटेलले ३९ बलमा ५ चौका र ३ छक्का सहित सर्वाधिक ५७ रनको अर्धशतकीय ईनिङ खेले । यस्तै साई होपले २३ बलमा २९ र जेक फ्रेजर-मक्गर्कले ८ बलमा २१ रन जोडे ।
ेंगलूरुका लागि यश दयालले ३ विकेट तथा लोकी फर्गुसनले २ विकेट लिए । स्वप्निल सिंह, मोहम्मद सिराज र क्यामरन ग्रीनले समान १/१ विकेट लिए ।
त्यसअघि टस हारेर पहिले ब्याटिङ गरेको बेंगलूरुले निर्धारित २० ओभरमा ९ विकेटको क्षतिमा १ सय ८७ रन बनायो ।
बेंगलूरुका लागि रजत पतिदरले ३२ बलमा ३ चौका र ३ छक्का सहित ५२ रनको अर्धशतकीय ईनिङ खेले । यस्तै विल ज्याक्सले २९ बलमा ४१ तथा क्यामरुन ग्रीनले ३२ रन बनाए ।
दिल्लीका खलिल अहमद र रशिख सलामले २/२ विकेट लिए भने इशान्त शर्मा, मुकेश कुमार र कुलदीप यादवले समान १/१ विकेट लिए ।
जित पछि पाँचौं स्थानमा उक्लिएको बेंगलूरुको १३ खेलमा १२ अंक भएको छ । पराजित दिल्लीको भने प्लेअफ पुग्ने सम्भावना कमजोर बनेको छ ।
