काठमाडौं । दक्षिण अफ्रिकामा जारी रहेको यू-१९ विश्वकपको पहिलो सुपर सिक्सको खेलमा नेपालले बुधबार बंगलादेशको सामना गर्दै छ ।
नेपाल र बंगलादेशबीचको खेल नेपाली समयअनुसार दिउँसो पौने २ मा माङगोङ ओभलमा सुरु हुदैछ ।
नेपाल र बंगलादेशबीच यु-१९ विश्वकपमा अहिलेसम्म दुई पटक भेट भएको छ । एक खेल नेपालले जित्दा एक खेल बंगलादेशले जितेको छ ।
२००२ मा न्युजिल्याण्डमा भएको विश्वकपमा नेपालले बंगलादेशलाई २३ रनले पराजित गरेको थियो । पहिले ब्याटिङ गरेको नेपालले ६ विकेट गुमाएर १ सय ६० रन बनाएको थियो । नेपालका लागि बासुदेव थापाले ५२ बलमा ४१ तथा मन्जित श्रेष्ठले २४ बलमा २७ रन बनाएका थिए ।
१ सय ६१ रनको लक्ष्य पछ्याएको बंगलादेश ४७ दशमलब ३ ओभरमा १ सय ५७ रनमा अल आउट भएको थियो । नेपालका लागि बरदान चालिसेले चार तथा विनोद दासले दुई विकेट लिएका थिए ।
२०१६ को विश्वकपमा नेपालले पछिल्लो पटक बंगलादेशसँग खेलेको थियो । घरमा नै आयोजना भएको विश्वकपमा बंगलादेश ६ विकेटले विजयी भएको थियो । सो खेलमा पहिले ब्याटिङ गरेको नेपालले ९ विकेट गुमाएर २ सय ११ रन बनाएको थियो । नेपालका लागि राजु रिजालले ८० बलमा ७२ तथा सुनिल धमलाले ६२ बलमा २५ रन बनाएका थिए ।
२ सय १२ रनको लक्ष्य बंगलादेशले १० बल अगाबै ४ विकेट गुमाएर पूरा गरेका थियो । नेपालका लागि सुनिल धमलाले दुई तथा सन्दीप लामिछानेले एक विकेट लिएका थिए ।
विश्वकपमा मिश्रीत नतिजा ल्याएको नेपालले एसिया कपमा भने बंगलादेशसँग शतप्रतिशत हार ब्यहोरेको छ । यु-१९ एसिया कपमा नेपाल र बंगलादेशबीच तीन भेट भएकोमा तीनैमा नेपाल पराजित भएको छ ।
