काठमाडौं । पपुवा न्युगिनी(पीएनजी)विरुद्ध त्रिदेशीय टी-ट्वान्टी आई सिरिज जित्न नेपालले १ सय ७२ रनको लक्ष्य पाएको छ ।
हङकङको मिसन रोड ग्राउन्डमा जारी खेलमा टस हारेर पहिले ब्याटिङ गरेको पीएनजीले निर्धारित २० ओभरमा ८ विकेट गुमाएर १ सय ७१ रन बनायो ।
पीएनजीका लागि ओपनर टोनी उराले ३७ बलमा ५ चौका र ४ छक्काको सहयोगमा ६१ रनको अर्धशतकीय ईनिङ खेले । ओली नोयले १० बलमा ३० रन बनाए । हिला भारीले १८ तथा चाड सोपारले १३ रन बनाए ।
नेपालका लागि कुशल भुर्तेल र आकाश चन्दले समान ३ विकेट लिए ।
मंगलबार भएको समूह चरणको खेलमा नेपालले पीएनजीलाई ८५ रनको फराकिलो अन्तरले पराजित गरेको थियो । घरेलु टोलीसँगको पहिलो खेल भने वर्षाका कारण रद्द भएको थियो ।
गत साता घरेलु भुमिमा नेदरल्यान्ड्स, नेपाल र नामिबिया रहेको त्रिदेशीय टी-ट्वान्टी आई सिरिजको फाइनल गुमाएको नेपालले यस सिरिजको उपाधी जित्ने लक्ष्यमा रहने छ ।
