काठमाडौं । भारतमा जारी १७ औं संस्करणको इन्डियन प्रिमियर लिग(आइपीएल)को ३३ औं खेलमा मुम्बई इन्डियन्सले पञ्जाब किंग्सलाई पराजित गरेको छ ।
पञ्जाबको घरेलु मैदान मुल्लापुरमा भएको खेलमा मुम्बई ९ रनले विजयी भयो ।
मुम्बईले दिएको १ सय ९३ रनको लक्ष्य पछ्याएको पञ्जाब १९ दशमलब १ ओभरमा अल आउट हुदै १ सय ८३ रन मात्र बनाउन सक्यो ।
पञ्जाबका लागि आशुतोष शर्माले २८ बलमा २ चौका र ७ छक्काको सहयोगमा ६१ रनको अर्धशतकीय ईनिङ खेले । शंशाक सिंहले २५ बलमा २ चौका र ३ छक्काको सहयोगमा ४१ रन बनाए ।
हरप्रित ब्रारले २० बलमा २ चौका र १ छक्काको सहयोगमा २१ रन बनाए । आठौं विकेटका लागि ब्रार र शर्माले ५७ रनको साझेदारी गरेर पञ्जाबको जितको सम्भावना देखाए पनि टोलीलाई जित दिलाउन सकेनन् ।
मुम्बईका लागि जसप्रित बुमराह र जेरार्ड कोट्जेले समान तीन तीन तथा आकाश मधवाल, हार्दिक पान्ड्या र श्रेयस गोपालले समान एक एक विकेट लिए ।
त्यसअघि टस हारेर पहिले ब्याटिङ गरेको मुम्बईले निर्धारित २० ओभरमा ७ विकेट गुमाएर १ सय ९२ रन बनाएको थियो ।
मुम्बईका लागि सुर्यकुमार यादवले ५३ बलमा ७ चौका र ३ छक्काको सहयोगमा ७८ रनको अर्धशतकीय ईनिङ खेले । रोहित शर्माले २५ बलमा २ चौका र ३ छक्काको सहयोगमा ३६ रन बनाए । शर्मा र यादवले दोस्रो विकेटका लागि ८१ रनको सानदार साझेदारी गरे ।
तिलक बर्माले १८ बलमा २ चौका र २ छक्काको सहयोगमा अविजित ३४ रन बनाए । तेस्रो विकेटका लागि यादव र बर्माले ४९ रनको साझेदारी गरे । टिम डेबिडले ७ बलमा २ चौका र १ छक्काको सहयोगमा १७ रन बनाए । कप्तान हार्दिक पान्ड्याले ६ बलमा १ छक्काको सहयोगमा १० रन बनाए ।
पञ्जाबका लागि हर्षल पटेलले तीन तथा कप्तान साम करन दुई विकेट लिए । कागिसो रबाडाले एक विकेट लिए ।
सातौं खेलमा तेस्रो जितका साथ मुम्बई अंक तालिकाको सातौं स्थानमा उक्लिएको छ । सातौं खेलमा पाँचौ हारका साथ पञ्जाब पुछारबाट दोस्रो स्थानमा छ ।