काठमाडौं । नेपाली राष्ट्रिय महिला क्रिकेट टिमकी पहिलो कप्तान नेरी थापा मगरले क्रिकेट खेलाडीको रुपमा सन्यास लिएकी छिन् ।
पुर्व कप्तान नेरीले राष्ट्रिय तथा अन्तर्राष्ट्रिय क्रिकेटबाट सन्यास लिएकी हुन् । उनले आइतबार सामाजिक सन्जालबाट सन्यासको घोषणा गरेकी हुन् ।
सन् २००७ मा नेपालले पहिलो पटक अन्तर्राष्ट्रिय महिला क्रिकेट खेल्दा नेरीको कप्तानीमा टोली घोषणा रहेको थियो । नेपालको पहिलो अन्तर्राष्ट्रिय प्रतियोगिता एसिसी वुमन्स टी-ट्वान्टी रहेको थियो । मलेसियामा भएको सो प्रतियोगितामा नेपाल फाइनलमा बंगलादेशसँग पराजित भएको थियो ।
सन् २००८ मा नेरीकै कप्तानीमा थाईल्यान्डमा नेपालले एसिसी यु.१९ वुमन्स च्याम्पियनसिप खेलेको थियो । मलेसियालाई ७ विकेटले हराउँदै नेपालले सो प्रतियोगिताको उपाधि जितेको थियो ।
१७ वर्षे क्रिकेटरको रुपमा आफ्नो यात्रामा धेरै उतारचढाब आएको नेरीले बताएकी छिन् । उनले नेपालका लागि ११ टी-ट्वान्टी खेलमा १७ विकेट लिनुका साथै ६३ रन बनाएकी छिन् । घरेलु प्रतियोगितामा नेरी हाल नेपाल एपीएफ क्लबमा रहेकी थिइन् ।