काठमाडौं । दक्षिण अफ्रिकामा जारी आईसीसी यू-१९ विश्वकप २०२४ को आफ्नो अन्तिम खेलमा नेपाल भारतसँग पराजित भएको छ ।
दक्षिण अफ्रिकामा भएको खेलमा नेपाल १ सय ३२ रनको फराकिलो अन्तरले पराजित भयो ।
भारतले दिएको २ सय ९८ रनको लक्ष्य पछ्याएको नेपालले निर्धारित ५० ओभरमा १ सय ६५ रन मात्र बनाउन सक्यो ।
नेपालका लागि कप्तान देब खनालले ५३ बलमा सर्वाधिक ३३ रन बनाए । ओपनर अर्जुन कुमालले ६४ बलमा २६ तथा अर्का ओपनर दिपक बोहोराले ४२ बलमा २२ रन बनाए । दुर्गेस गुप्ता २९ रनमा अविजित रहँदा आकाश चन्दले अविजित १८ रन बनाए ।
पहिलो विकेटका लागि कुमाल र बोहोराले ४८ रनको साझेदारी गरेका थिए । तर त्यसपछि नियमित रुपमा विकेट गुमाएपछि नेपाल कम रनमा समेटिन पुग्यो ।
अन्तिम विकेटका लागि चन्द र गुप्ताले ४५ रनको अविजित साझेदारी गरेका थिए ।
भारतका लागि सौम्य पाण्डेले चार तथा अर्सिन कुलकर्नीले दुई विकेट लिए ।
त्यसअघि टस जितेर ब्याटिङ रोजेको भारतले निर्धारित ५० ओभरमा ५ विकेट गुमाएर २ सय ९७ रन बनाएको थियो ।
भारतका लागि सचिन दास र कप्तान उदय सराहनले शतकीय ईनिङ खेले । उनले १ सय १ बलमा ११ चौका र ३ छक्काको सहयोगमा १ सय १६ रन बनाए । दासले ९३ बलमा १० चौका र २ छक्काको सहयोगमा शतक बनाएका थिए ।
कप्तान सराहनले १ सय ६ बलमा ९ चौकाको सहयोगमा शतक पूरा गरेका थिए । शतक बनाएको अर्को बलमा उनी आउट भए ।
भारतका लागि ६२ रनमा ३ विकेट गुमाएको स्थितिमा चौथो विकेटका लागि कप्तान उदय साहरन र दासले २ सय १५ रनको दोहोरो शतकीय साझेदारी गरे ।
ओपनर आदर्श सिंहले १८ बलमा २१ तथा प्रियान्शु मोलियाले ३६ बलमा १९ रन बनाए ।
नेपालका लागि गुलसन झाले तीन तथा आकाश चन्दले एक विकेट लिए ।
जितसँगै भारतले अपराजित रुपमा सेमिफाइनलमा स्थान बनाएको छ । नेपाल सुपर सिक्सका दुई खेल खेल्नु अगावै सेमिफाइनल दौडबाट बाहिरिएको थियो । नेपाल सुपर सिक्सको पहिलो खेलमा बंगलादेशसँग ५ विकेटले पराजित भएको थियो ।
विश्वकपमा नेपाल र भारतमा भएको यो तेस्रो खेल हो । तीनै खेलमा भारत अपरािजत रहेको छ ।
नेपालले आफ्नो इतिहासमा भारतलाई एक पटक मात्रै हराएको छ । नेपालले २०१७ को यू–१९ एसिया कपमा भारतलाई १९ रनले हराएको थियो ।