नेपाल प्रिमियर लिग (एनपिएल) को कमर्शियल राइट्स अधिकार ब्रान्ड लजिकले जितेको छ ।
नेपाल क्रिकेट संघ(क्यान)ले बोलकबोल प्रक्रियामार्फत मागेको ‘स्ट्राटेजिक एण्ड कमर्शियल राइट्स ब्रान्ड डिजिटल लजिक प्रालिले जितेको बताएको हो ।
आवेदनमा सबैभन्दा बढी ५ करोड ९२ लाख रुपैयाँ बोली लगाएर ब्रान्ड लजिकले सो अधिकार प्राप्त गरेको हो। यस सम्झौतासंगै ब्रान्ड लजिकको सहकार्यमा एनपिएल थप व्यवस्थित र दिगो बनाउने अपेक्षा गरिएको छ । कम्पनीले खेलको प्रचारप्रसार व्यवस्थापन देखि आर्थिक पक्षलाई थप मजबुत बनाउने जिम्मेवारी लिनेछ ।
सम्झौतामा लिगको ब्रान्डिङ, मार्केटिङ, प्रसारण अधिकार, प्रायोजन व्यवस्थापन, र ग्राउन्ड ब्रान्डिङको अधिकार समावेश गरिएको छ। प्रसारणसँगै प्रायोजनको व्यवस्थापन अब ब्रान्ड लजिकले नेपाल प्रिमियर लिगका खेलहरूलाई देशभर र अन्तर्राष्ट्रिय स्तरमा प्रसारण गर्ने अधिकार पाएको छ ।
साथै, विभिन्न प्रायोजकलाई समन्वय गर्दै लिगको आर्थिक पक्षलाई थप मजबुत बनाउन काम गर्नेछ। सम्झौतासँगै लजिकले अब लिगको सम्पूर्ण ब्रान्डिङ र प्रचारप्रसारको जिम्मेवारी लिएको ब्रान्ड लजिकका संस्थापक तथा प्रमुख कार्यकारी अधिकृत रोशन निरौलाले जानकारी दिए ।
उनले भने, ‘क्रिकेट मेरो सानैदेखिको प्रिय खेल हो। मैले बाल्यकालमा जसरी क्रिकेट खेल्न र हेर्न मन पराउँथे, आज त्यही खेलसँग हाम्रो कम्पनीलाई जोड्न पाउँदा उत्साहित छु। एनपिएललाई अझ राम्रो बनाउन र विश्वस्तरमा पुर्याउन सक्ने जिम्मेवारी पाउँदा मलाई गर्व लागेको छ।’ उनले थपे, ‘नेपाल प्रिमियर लिग केवल एउटा लिग होइन, यो नेपाली क्रिकेटको भविष्य हो । म आशा गर्छु कि नेपाली खेलप्रेमीहरूले यसलाई मन पराउनु हुनेछ, र हामी सबै मिलेर यो लिगलाई अझै उच्च स्थानमा पुर्याउनेछौं।’
रचनात्मक काम गर्दै आएको ब्रान्ड लजिकले आफ्नो सिर्जनात्मकता, नवीन सोच र उत्कृष्ट कार्यान्वयन क्षमताका कारण विज्ञापन तथा मार्केटिङ क्षेत्रमा छुट्टै पहिचान बनाउन सफल भएको छ ।
