काठमाडौं । दक्षिण अफ्रिकामा जारी आईसीसी यू–१९ विश्वकप २०२४ को सुपर सिक्समा नेपालले भारत र बंगलादेशसँग खेल्ने भएको छ ।
नेपाल समूह डी को निर्णायक खेलमा अफगानिस्तानलाई १ विकेटले हराउँदै सुपर सिक्समा पुगेको हो ।
समूह डी बाट नेपाल, पाकिस्तान र न्युजिल्यान्ड सुपर सिक्समा पुगेका छन् । नेपालले सुपर सिक्समा समूह ए को पहिलो र दोस्रो स्थानको टोलीसँग खेल्नेछ ।
समूह ए बाट भारत, बंगलादेशले शीर्ष २ मा रहँदै सुपरसिक्समा स्थान लगभग पक्का गरेका छन् । नेपालले यी दुई टोलीसँगै सुपर सिक्समा खेल्ने छ ।
तर,भारत र बंगलादेशको समान चार अंक रहेका कारण आइतबार हुने भारत र अमेरिकाको खेल पछि मात्र समूह विजेता र उपविजेताको टुंगो लाग्नेछ ।
खेलतालिका अनुसार नेपालले ३१ जनवरी अर्थात माघ १७ मा समूह ए को दोस्रो स्थानमा रहने टोलीसँग खेल्नेछ ।
नेपालले २ फेब्रुअरी अर्थात माघ १९ मा समूह ए को शीर्ष स्थानमा रहने टोलीसँग खेल्नेछ ।
