काठमाडौं । वेस्ट इन्डिज र अमेरिकामा जारी नवौं संस्करणको टी-२० विश्वकप क्रिकेटमा आज (शुक्रबार) क्यानडा र आयरल्यान्ड खेल्दै छन् ।
विश्वकपको तेस्रौं खेलमा समूह ए मा रहेका क्यानडा र आयरल्यान्डबीच नेपाली समय अनुसार शुक्रबार बेलुकी सवा आठमा अमेरिकाको न्युयोर्कमा खेल हुदैछ ।
दुवै टोली आफ्नो दोस्रो खेल खेल्दैछन् भने, पहिलो जितको खोजीमा रहेका छन् ।
युरोप महादेश छनोटको शीर्ष दुईमा रहँदै विश्वकप खेल्दै गरेको आयरल्यान्ड पहिलो खेलमा भारतसँग पराजित भएको थियो । अमेरिका महादेश छनोटको शीर्ष स्थानमा रहदै क्यानडा विश्वकप खेल्दैछ । पहिलो खेलमा क्यानडा सह-आयोजक अमेरिकासँग पराजित भएको थियो ।
नवौं संस्करणको यस विश्वकपमा पहिलो पहिलो पटक २० राष्ट्रको सहभागीता रहेको छ । सहभागी २० राष्ट्रलाई चार समूहमा विभाजन गरिएको छ । समूह ए मा क्यानडा र आयरल्यान्डका अलावा पाकिस्तान, भारत, अमेरिका तथा समूह बी मा अस्ट्रेलिया, इंग्ल्यान्ड, स्कटल्यान्ड, नामिबिया र ओमान छन् ।
समूह सी मा वेस्ट इन्डिज, न्युजिल्यान्ड, अफगानिस्तान, युगान्डा र पपुवा न्यु गिनी तथा समूह डीमा नेपाल, नेदरल्यान्ड्स, दक्षिण अफ्रिका, श्रीलंका र बंगलादेश छन् ।
हरेक समूहका शीर्ष दुई टोलीले सुपर आठमा स्थान बनाउने छन् । सुपर आठमा पनि दुई समूह हुनेछ । यसका हरेक समूहका शीर्ष दुई टोलीले सेमिफाइनलमा स्थान बनाउँने छन् । सेमिफाइनलका विजेता टोलीले फाइनलमा स्थान बनाउँदा फाइनलमा विजयी बन्ने टोलीले यस संस्करणको उपाधी जित्नेछ ।
नेपालले श्रीलंकासँग १२ जुन अर्थात ३० जेठ बुधबारको दिन फ्लोरिडामा विश्वकपको दोस्रो खेल खेल्नेछ ।
