नेपाल टि-ट्वान्टी लिग अन्तर्गत बिहिबार सम्पन्न दोश्रो खेलमा फार वेस्ट युनाइटेडले काठमाडौं नाइट्समाथि फराकिलो जित निकालेको छ । काठमाडौंलाई ८४ रनले हराएको फार वेस्टले जितसँगै प्लेअफमा पुग्ने सम्भावना पनि कायमै राखेको छ ।
जितका लागि फार वेस्टले दिएको एक सय ९८ रनको लक्ष्य पछ्याएको काठमाडौं निर्धारित २० ओभरमा नौ विकेटको क्षतिमा एक सय १४ रनमा समेटिएको थियो ।
काठमाडौंका लागि कमलसिंह ऐरीले २० रन बना । कप्तान ज्ञानेन्द्र मल्ल र सन्दिप रजालीले १७/१७, सुनम गौतमले १६, विरनदिप सिंहले १४ र सन्तोष कार्कीले १२ रन बनाए । बलिङमा फार वेस्टका करण केसी, दुर्गेश गुप्ता र कप्तान हसमतुल्लाह शाहिदीले दुई दुई विकेट लिए ।
यसअघि पहिले ब्याटिङ गरेको फार वेस्टले २० ओभरमा चार विकेटको क्षतिमा एक सय ९७ रन बनाएको थियो ।
फार वेस्टका लागि हसमतुल्लाह शाहिदीले सर्वाधिक ७६ रन, विनोद भण्डारीले ७३ र करण केसीले अविजित २२ रन बनाए। बलिङमा काठमाडौंका बसिर अहमदले तीन विकेट लिए । अभिनाश बोहोराले एक विकेट लिए ।
बिहीबारको खेलसँगै शीर्षस्थानमा रहेको लुम्बिनीको १६ अंक छ जसले जनकपुर संगै शिर्ष-२ स्थानमा रहने पक्का गरिसकेको छ । दोस्रो स्थानमा रहेको जनकपुरको १२, तेस्रो स्थानमा रहेको काठमाडौंको आठ, चौथो स्थानमा रहेको विराटनगरको ६, पाँचौं स्थानमा रहेको पोखराको ६ र अन्तिममा रहेको फार वेस्टको चार अंक छ । पुस २७ गतेसम्म सञ्चालन हुने लिगको विजेताले ५५ लाख र उपविजेताले ३० लाख रुपियाँ पुरस्कार पाउनेछन् ।
