काठमाडौं । दुई दिवसीय जय ट्रफी मेन्स एलिट कप क्रिकेट अन्तर्गत लिग चरणको अन्तिम खेलमा विभागिय टोली नेपाल पुलिस क्लबले बागमती प्रदेशविरुद्ध ९५ रनको अग्रता बनाएको छ।
जनकपुरस्थित रामजानकी मैदानमा दोस्रो इनिङ सुरु गरेको बागमती चार ओभरमा ८।० को स्थितीमा छ। बागमतीका लागि रित गौतम पाँच र इशान पाण्डे तीन रन बनाएका छन्।
पुलिसले २१५ रन बनाउँदै पहिलो इनिङमा १०२ रनको अग्रता लिएको थियो। पुलिसका लागि अमित श्रेष्ठले ९७ बलमा १० चौका र दुई छक्काको मद्दले सर्वाधिक ७९ रनको योगदान गरे।
यसैगरी अर्जुन साउदले ८२ बलमा आठ चौका र दुई छक्काको मद्दतले ७७ र गुल्शनकुमार झाले १७ रन बनाए।
यता, बागमतीका लागि कप्तान सन्दीप लामिछानेले चार, नन्दन यादव र प्रतिश जिसीले समान दुई तथा रिजन ढकालले एक विकेट लिए।
त्यसअघि टस हारेर ब्याटिङको निम्तो पाएको बागमती पहिलो इनिङमा ११२ रनमै समेटिएको थियो। बागमतीका लागि इशान पाण्डेले ९४ बलमा १० चौकाको म्ददते सर्वाधिक ७१ रनको योगदान गरे।
पुलिसका लागि ललितनारायण राजवंशीले चार, श्रवन यादवले तीन र कुशल भुर्तेलले दुई विकेट लिए।
तस्बिर : क्यान
