काठमाडौंमा जारि काठमाडौं मेयर्स कप अन्तर्गत बिहिबार सम्पन्न खेलमा शरद भेसावकर कप्तानीको नेपाल एपीएफ क्लबले सन्दिप लामिछाने कप्तानीको काठमाडौं मेयर-११ लाई ७ विकेटले पराजित गर्दै फाइनलमा नेपाल पुलिस क्लबसंगको भेट पक्का गरेको छ।
यससंगै फाल्गुन २९ गते अर्थात पर्सि दुई विभागीय टोलि नेपाल एपीएफ क्लब र नेपाल पुलिस क्लब उपाधिका लागि प्रतिस्पर्धा गर्नेछन्। ४ खेलमा समान ३ जित र १ हार बेहोरेता पनि नेट रन रेटमा पुलिस पहिलो र एपीएफ दोश्रो स्थानमा रह्यो। बागमती तेश्रो, आर्मी चौथो र काठमाडौँ मेयर्स-११ पाँचौ स्थानमा रह्यो। स्कोरकार्ड , अंकतालिका
मुलपानी क्रिकेट मैदानमा सम्पन्न खेलमा १७७ रनको लक्ष्य पछ्याएको एपीएफ क्लबले ४४.१ ओभरमा ३ विकेट गुमाएर लक्ष्य पुरा गर्यो। उसका लागि कप्तान शरद भेषवाकर र युवा ब्याट्सम्यान सन्दिप जोराले अर्धशतकीय पारि खेले।
खराब सुरुवात गरेको एपीएफले प्रतियोगितामा राम्रो लयमा रहेका ओपनर आशिफ शेखलाई खाता नखोली गुमायो। उनलाई अनुज चुनाराले इनिंग्सको पहिलो ओभरमै बोल्ड गरेका थिए। त्यसपछि ब्याटिंग गर्न आएका कप्तान भेसावकरले अर्का ओपनर शंकर रानासंग ४३ रनको साझेदारी गर्दै एपीएफको इनिंग्स सम्हाले। रानालाई युवा स्पिनर अनिल खरेलले ३१ रनको व्यक्तिगत स्कोरमा एलबीडब्ल्यु आउट पार्दै साझेदारी तोडे।
त्यसपछि ब्याटिंगमा आएका भुवन कार्कीलाई कप्तान लामिछानेले बोल्ड गर्दै एपीएफलाई दबाबमा ल्याए। कार्कीले १५ बलमा २ चौकाको मद्धतमा ११ रन बनाए। ५७/३ को संघर्षपूर्ण अवस्थाबाट कप्तान भेसावकरले सन्दिप जोरासंग चौथौं विकेटका लागि अविजित १२१ रनको शतकीय साझेदारी गर्दै एपीएफलाई जित दिलाए। जारि प्रतियोगितामा यो पहिलो शतकीय साझेदारी हो। भेषवाकरले ११८ बलमा ५ चौका र १ छक्काको मद्धतमा अविजित ६१ तथा जोराले ७९ बलमा ९ चौकाको मद्धतमा अविजित ६२ रन बनाए।
काठमाडौं मेयर-११ को बलिंगमा अनुज चुनारा (७-०-३३-१), अनिल खरेल (१०-२-३७-१) र सन्दिप लामिछाने (१०-१-३१-१) ले समान १ विकेट लिए।
यसअघि टस हारेर पहिले ब्याटिंगको निम्तो पाएको काठमाडौं मेयर-११ ले ४८.५ ओभरमा सम्पूर्ण विकेट गुमाएर १७७ रन बनाउंदै एपीएफलाई १७८ रनको चुनौतिपूर्ण लक्ष्य प्रस्तुत गरेको थियो। उसका लागि सन्दिप रजालीले सर्वाधिक ४८, हरिशंकर शाहले ३६ तथा बिक्रम भुसालले २० रन बनाए।
अविनास बोहोराले इनिंग्सको पहिलो ओभरमै ओपनर बिपिन रावललाई (४) बोल्ड गर्दै एपीएफलाई सानदार सुरुवात दिलाएका थिए। अर्का ओपनर खडक बोहोरा (१३) रन आउट भएपछि सन्दिप रजाली र हरिशंकर शाहले तेस्रो विकेटका लागि ६५ रनको साझेदारी गर्दै काठमाडौं मेयर-११ को इनिंग्स सम्हाले। रजाली आउट भएपछि काठमाडौं मेयर-११ को ब्याटिंग धराशायी बन्न पुगेको थियो।
काठमाडौं मेयर-११ लाई १७७ रनमै समेट्न एपीएफको बलिंगमा अविनास बोहिरा (८.५-०-४१-३) र कमल सिंह ऐरीले (१०-३-२५-३) समान ३ विकेट लिए। यस्तै बसन्त रेग्मी, शरद भेषवाकर र भुवन कार्कीले समान १ विकेट हात पारे।
यो पनि पढ्नुस :-
अरीयो र पारस प्रेरित बागमतीद्वारा आर्मी पराजित, बिनोदको शतक खेर
रुपन्देही सुपरलिग : शक्ति गौचनले अलराउण्ड प्रदर्शन गर्दा न्यू होराइजन फाइनलमा
