जिम्बाब्वेमा जारि आइसीसी विश्वकप छनोट २०२३ अन्तर्गत सातौं स्थानको लागि प्ले-अफ सेमीफाइनल खेलमा आज नेपालले युएईको सामना गर्दैछ। खेल हरारेमा रहेको टाकासिंगा स्पोर्टस् क्लबमा नेपाली समय अनुसार मध्यान्ह १२:४५ बाट सुरु हुनेछ।
यस खेलको विजेताले सातौं स्थानको लागि आयरल्यान्डसँग प्रतिस्पर्धा गर्नेछ भने पराजित हुने टोलीले भने नवौं स्थानका लागि अमेरिकासँग प्रतिस्पर्धा गर्नेछ ।
नेपाल र युएई एक दिवसीय अन्तराष्ट्रियका लागि परिचित प्रतिद्वन्द्वी हुन् । नेपाल र युएईबीच एक दिवसीय अन्तर्राष्ट्रियमा अहिलेसम्म १४ पटक प्रतिस्पर्धा भएको छ । नेपाल ८ पटक विजयी हुँदा ६ पटक युएईले खेल आफ्नो पक्षमा पारेको छ।
नेपाल र युएई बीच अन्तिम पाँच खेल मध्ये ४ खेलमा नेपाल विजयी हुँदा १ खेलमा युएई विजयी भएको छ। त्यसमध्ये पछिल्लो ४ खेलमा नेपालले युएईलाई पराजित गरेको छ। पछिल्लो पटक मेमा नेपालमा आयोजित एसीसी प्रिमियर लिगको फाइनलमा भेट हुँदा नेपालले युएईलाई ७ विकेटले पराजित गरेको थियो।
प्रतियोगिताको समुह चरणमा नेपाल समुह ‘ए’ को चौंथो स्थानमा रहंदा युएई समुह ‘बि’ को पाँचौ स्थानमा रहेको थियो। नेपालले ४ खेलमा १ जित र ३ हार बेहोर्दा युएई सबै ४ खेलमा पराजित भएको थियो।
नेपालको सम्भावित ११ : कुशल भुर्तेल, आसिफ शेख ( विकेटकिपर ), भिम शार्की, रोहित पौडेल ( कप्तान ), आरिफ शेख, कुशल मल्ल, दिपेन्द्र ऐरी, गुल्सन झा, सन्दिप लामिछाने, करन केसी, ललित राजवंशी
