- विकेटनेपाल, साउन २
आईसीसी एसिया बिश्वकप छनौट प्रतियोगिता अन्तर्गत नेपालले आयोजक सिंगापुरलाई ४ विकेटले पराजित गर्दै पहिलो जित दर्ता गरेको छ l
पदंग क्रिकेट मैदानमा सम्पन्न निर्धारित ५० ओभरको खेलमा टस हारेर पहिले ब्याटिंग गरेको सिंगापुरले २९ ओभरमा सम्पूर्ण विकेट गुमाई मात्र ७३ रन बनाउन सकेको थियो l सन्दिप लामिछानेले ५ , शाहब आलमले ३ तथा किशोर महतोले २ विकेट हात पारेपछि सिंगापुरले कमजोर ब्याटिंग गर्यो l
सन्दिपले ८ ओभर बलिंग गर्दै २ मेडन ओभर सहित २१ रन खर्चेका थिए जुन क्रममा सिंगापुरको माथिल्लो क्रम तहसनहस हुनपुगेको थियो l कसिलो बलिंग गरेका शाहब आलमले ६ ओभरमा मात्र १२ रन दिए l किशोर महतोले २ विकेट लिन ६ ओभरमा २५ रन खर्चिएका थिए l
सिंगापुरको लागि नवौ नम्बरमा ब्याटिंग गरेका ब्रिगु ऐएरले ४२ रनको इनिंग खेलेका थिए l उनले ३९ बलमा ६ चौका र १ छक्का प्रहार गर्दै सिंगापुरको इज्जत ढाकेका थिए l ओपनर सिङ अग्रवालले ११ रन बनाउने बाहेक अन्य सिंगापुर ब्याट्सम्यानले दोहोरो अंकमा रन बनाउन सकेनन् l
जवाफमा ७४ रनको लक्ष पछ्याएको नेपालले १७.३ ओभरमा ६ विकेटको नोक्सानीमा लक्ष पुरा गर्यो l
लक्ष पछ्याउने क्रममा नेपालले पनि लगातार विकेट गुमाएको थियो l ओपनर आसिफ शेखको खराब लय जारि रह्यो भने सन्दिप सुनार पनि सस्तैमा आउट हुनपुगे l आसिफ ४ र सन्दिप १ रन बनाएर आर्यमन सुनिलको बलमा आउट भएका थिए l
तेश्रो नम्बरमा ब्याटिंग गरेका प्रनित थापाले ३ चौका प्रहार गर्दै २३ रन बनाउदै जितलाई सहज बनाउने प्रयास गरेपनि उनि अंशको बलमा बोल्ड आउट हुनपुगेका थिए l दिपेन्द्र ऐरी पनि २ रन बनाएर आउट भएपछि नेपाल समस्यामा देखिएको थियो l अनिल साह १९ रन बनाएर तथा प्रकास केसी ६ रन पेभेलियन फर्किएपछि नेपालले ६ विकेट ६९ रनमा गुमाएको थियो l
रोहित पौडेल र पवन सर्राफले क्रमशः अविजित ११ र ४ रन बनाउदै नेपाललाई जितसम्म पुर्याएका थिए l
एसिया बिश्वकप छनौट प्रतियोगिता अन्तर्गत पहिलो दिन सम्पन्न दोश्रो खेलमा अफगानिस्तानले मलेसियालाई ८ विकेटले सहजै पराजित गर्यो l त्यसक्रममा मलेसियाले दिएको ५४ रनको लक्ष उसले ५.४ ओभरमा भेटाएको थियो l
नेपालले प्रतियोगिता अन्तर्गत दोश्रो खेल भोलि मलेसियाको समना गर्नेछ l ( पुरा खेल तालिका )
प्रतियोगिताको बिजेता टिम न्युजिल्याण्डमा २०१८ जनवरीमा संचालन हुने यु-१९ बिश्वकप खेल्न छनौट हुनेछ l प्रतियोगितामा अफगानिस्तान, नेपाल, मलेसिया र आयोजक सिंगापुर सहभागी छन् l
