काठमाडौं । विभागीय टोली नेपाल पुलिस क्लबले प्रधानमन्त्री कप एक दिवसीय पुरुष राष्ट्रिय क्रिकेट प्रतियोगितामा विजयी यात्रा जारी राखेको छ।
भैरहवास्थित सिद्धार्थ क्रिकेट रंगशालामा बुधबार सम्पन्न खेलमा पुलिस क्लबले गण्डकी प्रदेशलाई ७ विकेटले पराजित गरेको हो। पुलिसले अपराजित यात्रा कायम राख्दै लगातार छैटौं जित निकालेको हो।
गण्डकीले दिएको ९३ रनको सामान्य लक्ष्य पुलिसले १६ ओभरमा ३ विकेट गुमाएर पूरा गर्यो। पुलिसका लागि कप्तान दीपेन्द्र सिंह ऐरीले सर्वाधिक ५४ रनको योगदान गरे। ऐरीले २३ बलको सामना गर्दै ३ चौका र ६ छक्का प्रहार गरे।
ओपनर अर्जुन साउदले अविजित १८ र दीलिप नाथले १० रन बनाए। अमित श्रेष्ठले ७ रनमा बनाउँदा कुशल भुर्तेल शून्य रनमा आउट भए।
त्यसअघि टस जितेर पहिला ब्याटिङ गरेको गण्डकीले २३ ओभर २ बलमा सबै विकेट गुमाउँदै मात्र ९२ रन बनाएको थियो। गण्डकीका लागि अर्जुन कुमालले सर्वाधिक ४८ रनको योगदान गरे।
उनले ६३ बलको सामना गर्दै ८ चौका प्रहार गरे। रोहित चन्द र सुवास भण्डारीले समान १०/१० रन बनाउनुबाहेक अन्य खेलाडीले दोहोरो अंकमा रन बनाउन सकेनन्। वंश क्षेत्री, दीपक डुम्रे, सन्दीप पराजुली र कप्तान विपिन खत्री रन नै नबनाई आउट भए। सुदीप अर्याल ७ रनमा नटआउट रहे।
पुलिसका ललित राजवंशी र गुल्शन झाले कसिलो बलिङ गरेपछि गण्डकी सस्तैमा समेटिएको हो। ललित एक्लैले ५ विकेट लिए। गुल्सन झाले चार विकेट लिए।
