धनगढीमा जारि प्रधानमन्त्री कप महिला टि-ट्वान्टी प्रतियोगिता अन्तर्गत तेश्रो दिन सम्पन्न समुह ‘बि’ अन्तर्गतको दुई खेलमा एपीएफ र सुदूरपश्चिम प्रदेश विजयी भएका छन्।
एपीएफको विजयी सुरुवात
प्रदेश नम्बर-२ लाई ४८ रनले पराजित गर्दै शशस्त्र प्रहरी बल ( एपीएफ ) ले महिला राष्ट्रिय टि-ट्वान्टी प्रतियोगितामा विजयी सुरुवात गरेको छ।
धनगढीको फाप्ला मैदानमा सम्पन्न समुह ‘बि’ अन्तर्गतको खेलमा एपीएफले दिएको ९९ रनको लक्ष्य पछ्याउने क्रममा प्रदेश-२ ले निर्धारित २० ओभरमा ९ विकेट क्षेतीमा ५० रन मात्र बनाउन सक्यो।
प्रदेश-२ को लागि मेलिना रायमाझीले २० रन बनाउनु बाहेक अन्य ब्याटरले दोहोरो अंकमा रन बनाउन सकेनन्। एपीएफ बलर सुष्मा श्रेष्ठले २ विकेट तथा सोनु खड्का, रेखा रावल, करुणा भण्डारी र सिता राना मगरले समान एक विकेट लिए।
यस अघि टस हारेर ब्याटिंग गरेको एपीएफले निर्धारित १५ ओभरमा ८ विकेट क्षेतीमा ९८ रन मात्र बनाउन सक्यो। एपीएफको लागि ज्योति पाण्डेले सर्वाधिक २४, इन्दु बर्माले २१, रोमा थापाले १४ तथा ममता चौधरीले ११ रन योगदान दिए। प्रदेश-२ को बलिंगमा बिमला मगरले ३ तथा सन्तोषी चौधरी , रोजी कडारी र अनुराधा चौधरीले समान एक विकेट लिए।
गण्डकी बिरुद्ध सुदूरपश्चिमको सहज जित
गण्डकी प्रदेशलाई ९ विकेटले सहजै पराजित गर्दै सुदूरपश्चिम प्रदेशले प्रधानमन्त्री कप महिला राष्ट्रिय टि-ट्वान्टी प्रतियोगितामा विजयी सुरुवात गरेको छ।
धनगढीको फाप्ला मैदानमा सम्पन्न समुह ‘बि’ अन्तर्गतको खेलमा गण्डकी प्रदेशले दिएको ३२ रनको लक्ष्य सुदूरपश्चिमले १ विकेट क्षेतीमा २.१ ओभरमा भेटायो। सुदूरपश्चिमको लागि कविता जोशीले ८, शोभा रोकायाले ५ रन बनाए। गण्डकी बलर मनिषा उपाध्यायले १ विकेट हात पारिन्।
यस अघि टस जितेर ब्याटिंग गरेको गण्डकीले १८ ओभरमा सम्पूर्ण विकेट गुमाएर ३१ रन बनाएको थियो। उसको लागि पेम्लामु शेर्पाले सर्वाधिक ६ रन, स्रिस्टि जैसीले ५ रन योगदान दिए। १९ रनमा १ विकेट गुमाएको अवस्थाबाट थप १२ रन जोड्दा उसले सम्पूर्ण विकेट गुमाउन पुग्यो।
सुदूरपश्चिमको बलिंगमा दिपा जोरा ( ३-०-५-२ ) र कविता जोशी ( ४-२-३-२ ) ले समान दुई विकेट तथा कविता कुँवर ( ४-१-८-१ ) र इश्वरी बिस्टले ( ३-०-८-१ ) समान एक विकेट लिए।
प्रतियोगिता अन्तर्गत आजै सम्पन्न समुह ‘बि’ अन्तर्गतको पहिलो खेलमा एपिफले प्रदेश नम्बर-२ लाई ४८ रनले पराजित गर्दै विजयी सुरुवात गय्रो।
प्रतियोगिता अन्तर्गत भोलि दुई खेल हुनेछन्। पहिलो खेलमा बिहान ९ बजे प्रदेश-१ र लुम्बिनी प्रदेश तथा दिउँसो बागमती प्रदेश र कर्णाली प्रदेश बीच प्रतिस्पर्धा हुनेछ। समुह ‘ए’ बाट प्रदेश-१ र लुम्बिनी सेमीफाइनल प्रवेश गरिसकेका छन्।