- विकेटनेपाल, भदौ २९
एसीसी यु-१९ ( पूर्वी क्षेत्र ) प्रतियोगिता अन्तर्गत शनिबार हुने सेमीफाइनलमा नेपालको खेल मलेसियासंग हुने पक्का भएको छ ।
समुह ‘ए’ मा रहेको नेपालले आफ्नो ३ वटै खेल जित्दै समुह बिजेताको रुपमा सेमीफाइनलमा स्थान बनाईसकेको छ । समुह ‘बि’ मा हंगकंगले पनि ३ वटै खेल जित्दै समुह बिजेता भयो भने ३ मध्ये २ खेल जित्दै मलेसिया समुह ‘बि’ को उपविजेताको रुपमा सेमीफाइनल प्रवेश गरेको छ। समूह ‘ए’ बाट उपविजेताको रुपमा सिंगापुर पनि सेमीफाइनल प्रवेश गरिसकेको छ ।
शनिबार हुने २ वटा सेमीफाइनलमामा समुह ‘ए’ बिजेता नेपालले समुह ‘बि’ को उपविजेता मलेसियाको सामना गर्नेछ । यस्तै अर्को सेमीफाइनलमा समुह ‘बि’ को बिजेता हंगकंगले समुह ‘ए’ को उपविजेता सिंगापुरको सामना गर्नेछ ।
सेमीफाइनल खेल शनिबार बिहान ७:१५ बजे ( नेपाली समय) सुरुहुने छ। खेल किनरारा ओभल मैदानमा हुनेछ जुन मैदानमा नेपालले भुटानलाई ९ विकेटले पराजित गरेको थियो।
प्रतियोगिताको फाइनल खेल आइतबार किनरारा मैदानमा खेलिनेछ जसको बिजेता नोभेम्बरमा मलेसियामा संचालन हुने यु-१९ एसिया कप खेल्न छनौट हुनेछ । एसिया कपमा एसियाली टेस्ट रास्ट्रहरु भारत, पाकिस्तान, श्रीलंका र बंगलादेश पनि सहभागी हुनेछन्।
सेमीफाइनल र फाइनल खेलको फेसबुक लाइभ विकेटनेपाल फेसबुक पेजमा हुनेछ भने खेलको टेक्स्ट अपडेट पेज र वेबसाइट दुवैमा हुनेछ ।
सिंगापुरलाई ७ विकेटले पराजित गर्दै नेपाल सेमीफाइनलमा
सिंगापुरलाई ७ विकेटले पराजित गर्दै समुह ‘ए’ को बिजेताको रुपमा नेपाल एसीसी यु-१९ पूर्वी क्षेत्र प्रतियोगिताको सेमीफाइनलमा पुगेको छ । ( स्कोरकार्ड )
प्रतियोगितामा लगातार ३ खेल जित्दै नेपाल समुह ‘ए’ को बिजेताको रुपमा सेमीफाइनल प्रवेश गरेको हो । नेपालले पहिलो खेलमा थाईल्याण्डलाई २५५ रनले, दोश्रो खेलमा भुटानलाई ९ विकेटले पराजित गरेको थियो ।
सिंगापुरले दिएको ६८ रनको लक्ष नेपालले १३.४ ओभरमै पुरा गर्दै सहज जित हात पार्यो l
नेपालको लागि सुमित महर्जनले अविजित १० र सन्दिप जोराले अविजित ७ रन बनाउदै जित सम्म पुर्याएका थिए । ओपनर सन्दिप सुनारले २०, आसिफ शेखले ६ तथा अनिल शाहले १८ रन बनाएर विकेट गुमाएका थिए ।
मलेसियन बलर अभि दीक्षितले २ विकेट र अंश भार्गबले १ विकेट हात पारेका थिए ।
खेलमा टस जितेर ब्याटिंग गरेको सिंगापुरलाई नेपालले ६७ रनमै अलआउट गरेको थियो ।
नेपालको लागि अफ स्पिनर पवन सर्राफले उत्कृस्ट बलिंग गर्दै ६ विकेट हात पारे । उनले ८ ओभर बलिंग गर्दै ४ मेडन ओभर सहित १२ रन खर्चिएका थिए ।
यस्तै ओपनिंग बलर किशोर महतोले २ सुरुवाती विकेट हात पारेका थिए । दिपेन्द्र ऐरी र सन्दिप लामिछानेले १-१ विकेट आफ्नो नाम गरे ।
सिंगापुर ब्याट्सम्यान सिद्धान्त र अर्यमान उचिलले समान २०/२० रन योगदान दिएका थिए । उचिलले २ छक्का समेत प्रहार गरे भने सिद्धान्तले १ छक्का र १ चौका प्रहार गरेका थिए ।
