काठमाडौं । भ्याली कप टी-२० क्रिकेट प्रतियोगितामा काठमाडौं जिल्ला क्रिकेट र ग्रेट हिमालयन क्रिकेट एकेडेमी विजयी भएका छन् ।
प्रतियोगिताको आफ्नो पहिलो खेलमा जित हात पार्ने क्रममा ग्रेट हिमालयनले ओसिस क्रिकेट एकेडेमिलाई ६ विकेटले पराजित गरेको छ ।
पहिले ब्याटिङ गरेको ओसिसले निर्धारित २० ओभरमा ७ विकेट गुमाएर १ सय २० रन बनाएको थियो ।
ओसीसका लागि निश्चल श्रेष्ठले २१ बलमा २६ तथा केशब साउदले २४ बलमा १८ रन बनाए । शंकर रानाले १६ बलमा १७ रन बनाए ।
ग्रेट हिमालयनका लागि रुपेश श्रीवास्तव, अभिसेक थापा र चन्द्रकान्त पौडेलले समान १/१ विकेट लिए ।
आसिसले दिएको १ सय २१ रनको लक्ष्य ग्रेट हिमालयनले १७ दशमलब ३ ओभरमा ४ विकेट गुमाएर पूरा गर्यो ।
ग्रेट हिमालयनका लागि प्लेयर अफ द म्याच भएका सम्राट भुषालले ५० बलमा ५३ तथा अशोक पौडेलले २२ बलमा ३४ रन बनाए ।
ओसीसकासुमित नेवारले ३ विकेट लिए ।
जितका साथ प्रतियोगिता सुरु गरेको ग्रेट हिमालयन समूह बी को दोस्रो स्थानमा छ । लगातार दोस्रो हारका साथ ओसीस समूह बी को पुछारमा रहेको छ ।
आज नै भएको महिला तर्फको खेलमा भक्तपुर जिल्ला महिला टिमलाई ९ विकेटले पराजित गरि काठमाडौं जिल्ला महिला टिम विजयी भएको छ ।
पहिले ब्याटिङ गरेको भक्तपुरले १६ दशमलब ३ ओभरमा अल आउट हुदैं ४५ रन बनाएको थियो ।
भक्तपुरले दिएको ४६ रनको लक्ष्य काठमाडौंको ९ दशमलब १ ओभरमा १ विकेट गुमाएर लक्ष्य पूरा गर्यो ।
प्रतियोगिता भक्तपुर जिल्ला क्रिकेट संघको आयोजनामा १९ गतेसम्म जारी रहने छ । प्रतियोगितामा पुरुषतर्फ ६ र महिलातर्फ तीन टोलीको सहभागिता रहनेछ।
पुरुषतर्फ भक्तपुर क्रिकेट सेन्टर, भक्तपुर क्रिकेट एक्सिलेन्ट सेन्टर, बल पार्क स्पोर्टस इभेन्ट एन्ड एकेडेमी ललितपुर, ग्रेट हिमालयन क्रिकेट एकेडेमी ललितपुर, क्रिकेट एक्ससिलेन्ट सेन्टर काठमाडौं र ओसिस क्रिकेट एकेडेमी काठमाडौं सहभागी हुनेछन् ।
पुरुषतर्फका सहभागी टोलीलाई दुई समूहमा विभाजन गरिएको आयोजकले जनाएको छ ।
यसैगरी महिलातर्फ काठमाडौं, ललितपुर र भक्तपुर जिल्ला क्रिकेट संघको सहभागिता रहनेछ ।
प्रतियोगिताको सम्पूर्ण खेलहरु मुलपानी क्रिकेट मैदानमा हुनेछ। महिला र पुरुष दुवैतर्फका विजेताले २५ हजार र उपविजेताले १५ हजार रुपैयाँ प्राप्त गर्नेछन्।
