प्रदेश नम्बर ३ लाई ६४ रनले पराजित गर्दै डिफेन्डिङ च्याम्पियन त्रिभुवन आर्मी क्लब सुनसरीको इनरुवामा जारि मनमोहन मेमोरियल एकदिवसीय राष्ट्रिय प्रतियोगिताको फाइनल प्रवेश गरेको छ।
बुधबार सम्पन्न सेमीफाइनलमा आर्मीले दिएको २ सय १७ रनको लक्ष्य पछ्याउने क्रममा प्रदेश नम्बर ३ ले ३८.१ ओभरमा सम्पूर्ण विकेट गुमाएर १५२ रन मात्र बनाउन सक्यो। स्कोरकार्ड
लक्ष्य पछ्याउने क्रममा प्रदेश-३ ले निकै कमजोर सुरुवात गरेको थियो जुन क्रममा पहिलो ७ विकेट ७३ रन जोड्दा १९.१ ओभरमै गुमाउन पुगेको थियो। ओपनर रित गौतम खाता नखोली नखोली आउट भए भने कप्तान सुबास खकुरेल १५, इशान पाण्डे १७, जितेन्द्र सिंह ठकुरी २ , अभिषेक बस्नेत ५ तथा आदील खान ६ रन बनाएर आउट भए।
आठौँ विकेटको लागि सोनु तामांग र रामनरेश गिरिले ४८ रनको साझेदारी गरे। गिरि ४ रन बनाएर आउट भएपछि सोनु तामांगले नन्दन यादब र गौतम केसीसंग साझेदारी गर्दै जितको आशा दिलाए। यस क्रममा सोनुले आफ्नो अर्धशतक पनि पुरा गरे।
७४ रन बनाएका सोनु ३८ औं ओभरमा कुशल मल्लबाट क्याच आउट भए जस अघि उनले ७५ बलमा ६ छक्का र ४ चौका प्रहार गरे।
प्रदेश ३ को बलिंगमा देब्रे हाते स्पिनर सुशन भारिले सर्वाधिक ३ विकेट लिए। भारिले ८.१ ओभरमा ३ मेडन ओभर गर्दै २३ रन खर्चिए। अर्का देब्रे हाते स्पिनर शाहब आलमले २ विकेट तथा बिक्रम सोब, हरि बहादुर चौहान , हरि कृष्ण झा र कुशल मल्लले समान १ विकेट लिए।
यस अघि टस जितेर ब्याटिंग रोजेको आर्मीले निर्धारित ४७ ओभरमा सबै विकेट गुमाएर २१६ रन बनाएको छ। ढिला सुरु भएका कारण खेल ४७ ओभरमा झारिएको थियो।
आर्मीको लागि ओपनिंग ब्याट्सम्यान अनिल मण्डलले सर्वाधिक ४३ रन बनाए जुन क्रममा ७३ बलमा ३ चौका प्रहार गरे। यस्तै कुशल मल्लले २६ बलमा ४ चौका र २ छक्का मदतले ३७ रन बनाए। रोहित पौडेलले २९, बिक्रम सोबले २४, राजेश पुलामीले १७ तथा भिम शार्कीले १५ रन बनाए।
प्रदेश-३ को बलिंगमा तिब्र गति बलर गौतम केसीले ४ विकेट लिए जुन क्रममा ७.३ ओभर बलिंग गदै २२ रन खर्चिए। तिलक राज भण्डारी, नन्दन यादब र इशान पाण्डेले समान २ विकेट लिए।
