काठमाडौं । क्यानडा-११ ले नेपाल ए विरुद्धको तीन खेलको एकदिवसीय सिरिज २-१ ले जितेको छ ।
मुलपानी क्रिकेट मैदानमा भएको सिरिजको तेस्रो तथा निर्णायक खेलमा नेपाल ए लाई ४ विकेटले पराजित गर्दै क्यानडा-११ ले सिरिज जितेको हो ।
नेपालले दिएको १ सय ८२ रनको लक्ष्य क्यानडा-११ ले ३८ दशमलब ३ ओभरमा ६ विकेट गुमाएर पूरा गर्यो ।
क्यानडाका लागि निकोलस किर्टनले ७८ बलमा ५८ रनको अर्धशतकीय ईनिङ खेले । उनले ६ चौका प्रहार गरेका थिए । ओपनर आरोन जोनसनले ३१ बलमा २ चौका र ४ छक्काको सहयोगमा ४२ रन बनाए । नवनित धालीवालले ४५ बलमा ३८ रन बनाए
नेपालका लागि शाहव आलमले ४ तथा बसिर अहमद र शेर मल्लले समान ११ विकेट लिए ।
त्यसअघि टस हारेर ब्याटिङ गरेको नेपाल ४७ ओभरको अन्तिम बलमा १ सय ८१ रन बनाउँदै अल आउट भएको थियो ।
नेपालका लागि ओपनर आशुतोष घिरैयाले ४८ बलमा २८ रन बनाए । ५ चौका प्रहार गरेका आशुतोष क्यानडाका कप्तान साद वीन जाफरको बलमा आउट भए । अर्का ओपनर अर्जुन कुमालले ५३ बलमा २ चौकाको सहयोगमा २७ रन बनाए । अर्जुन २१ औं ओभरको दोस्रो बलमा डिलोन हेलिङ्गरको बलमा आउट भए ।
बसिर अहमद ४० बलमा २५ रन बनाउँदै रन आउट भए । कप्तान सन्दीप जोराले २८ बलमा ३ चौका र १ छक्काको सहयोगमा २४ रन बनाए । हेलिङ्गरको बलमा २३ औं ओभरको दोस्रो बलमा आउट भए ।
राशिद खानले २५ बलमा १९ रन बनाए । प्रतिश जिशीले २० बलमा १९ रन बनाए । क्यानडाका लागि हर्ष थाकर, डेलिन हेलिङ्गर र निकोलस किर्टनले समान २/२ तथा कप्तान साद वीन जाफर र कलिम सानले समान १/१ विकेट लिए ।
पहिलो खेलमा क्यानडा-११ विजयी हुँदा दोस्रो खेल नेपाल ए ले जितेको थियो ।
