काठमाडौं । अष्ट्रेलियाका ओपनर डेविड वार्नरले आफ्नो १ सयौं टी-ट्वान्टी खेलमा प्लेयर अफ दि म्याच अवार्ड पाएका छन् ।
वेस्टइन्डिजविरुद्ध शुक्रबार भएको टी-ट्वान्टीआई खेलमा वार्नरले आफ्नो १ सय खेल पूरा गरेका हुन् । वार्नरले २००९ जनवरी ११ मा दक्षिण अफ्रिकाविरुद्ध टी-ट्वान्टीआई डेब्यु गरेका थिए ।
वार्नरले टेस्ट, ओडिआई तथा टी-ट्वान्टी आईको आफ्नो १ सयौं खेलमा प्लेयर अफ दि म्याच बन्ने कीर्तिमान समेत बनाएका छन् । वार्नरको १ सयौं टी-ट्वान्टी खेलमा अष्ट्रेलियाले वेस्ट इन्डिज माथि ११ रनको जित दर्ता गरेको छ ।
होबार्टमा भएको खेलमा अष्ट्रेलियाले निर्धारित २० ओभरमा ७ विकेट गुमाउँदै २ सय १३ रन बनाएको थियो ।
२ सय १४ रनको लक्ष्य पछ्याएको वेस्ट इन्डिजले २० ओभरमा ८ विकेट गुमाएर २ सय २ रनमात्र जोड्यो । यो जितसँगै तीन खेलको सिरिजमा अष्ट्रेलिया १-० ले अग्रता बनाएको छ ।
यसै महिना टेस्ट क्रिकेटबाट सन्न्यास लिएका वार्नरले ३६ बलमा ७० रनको अर्धशतकीय इनिङ खेल्दै बलियो सुरुवात दिलाएका थिए । उनले १२ चौका र १ छक्का प्रहार गरे ।
दोस्रो खेल आइतबार हुनेछ ।
