जिल्ला क्रिकेट सङ्घ दाङको अध्यक्षमा पुनः प्रदीप मजगैयाँ निर्वाचित भएका छन्।
घोराहीमा सोमबार भएको चौथो जिल्ला अधिवेशनले मजगैयाँको अध्यक्षतामा १३ सदस्यीय जिल्ला कार्यसमिति चयन गरेको निर्वाचन समितिका संयोजक अधिवक्ता नारायण डाँगीले जानकारी दिए।
सङ्घको उपाध्यक्षमा किशोरकुमार घर्तीमगर, सचिवमा सञ्जु केसी ‘पुरन’ र कोषाध्यक्षमा बालकृष्ण खत्री निर्वाचित भएका छन् । सदस्यहरुमामा किशोरचन्द्र गौतम, कैलाश रोकामगर, अनु केसी, केशव झाँक्री मगर, प्रविन बुढामगर, रुपेश शर्मा, विकास आचार्य, सन्जोग गिरी र सन्दीप घर्ती निर्वाचित भएका छन् ।
निर्वाचनका लागि दाङ आउनुभएका सङ्घका केन्द्रीय सचिव दुर्गाराज पाठकले दाङ क्रिकेट क्षेत्रको विकासका लागि सम्भावना बोकेको ठाउँ भएको बताउनुभयो । उहाँले पूर्वाधारसँगै खेलाडीको क्षमता विकासमा ध्यान दिनुपर्नेमा जोड दिए ।
लुम्बिनी प्रदेश क्रिकेट सङ्घका अध्यक्ष दुर्गाबहादुर थापाले पूर्वाधारको विकाससँगै प्रतियोगिता सञ्चालन गरेर खेलाडी उत्पादनमा ध्यान दिनुपर्ने बताए ।