विकेटनेपाल- २७ पौष , बिहिवार
गत बर्ष जुनमा टेस्ट रास्ट्रको मान्यता पाएको आयरल्यान्डले भारतीय टिमसंग यो बर्ष आफ्नै घरमा खेल्ने भएको छ।
भारतीय क्रिकेट कन्ट्रोल बोर्ड (बिसिसिआई) ले बुधवार दिएको जानकारी अनुसार, भारतले आगामी जुन माहिनामा आएरल्याण्ड बिरुद्ध दुई खेल खेल्ने भएको हो। भारतले आगामी जुनमा आएरल्याण्ड बिरुद्ध २ टि-२० अन्तर्राष्ट्रिय खेल खेल्ने भएको छ।
जुलाई महिनामा भारतले गर्ने इंगल्याण्डको भ्रमण अघि आएरल्याण्डमा गएर भारतले टि-२० खेल खेल्नेछ। दुवै खेल आएरल्याण्डको डब्लिन मैदानमा जुन २७ र २९ तारिखमा हुने तालिका छ।
टेस्ट मान्यता पाएको १ बर्ष पुगेपनि पहिलो टेस्ट हालसम्म नखेलेको आयरल्याण्डले पाकिस्तानसंग मे ११-१५ मा पहिलो टेस्ट खेल्ने तय भइसकेको छ।
अन्तिमपटक भारतले आएरल्याण्डको भ्रमण सन् २००७ को जुनमा गरेको थियो। सो भ्रमणका क्रममा भारतले आएरल्याण्ड बिरुद्ध बेलफास्तमा एउटा एकदिवसीय खेल खेलेको थियो जुन खेलमा भारत ९ विकेटले बिजयी भएको थियो । त्यहि भ्रमणकै क्रममा बेलफास्टमै भारतले दक्षिण अफ्रिका बिरुद्ध तिन एक दिवसीय समेत खेलेको थियो।
आयरल्याण्ड प्रशिक्षक ग्राम फोर्डले भ्रमणलाई ठुलो अवसरको रुपमा लिएका छन्-
“यो गजबको खबर हो खेलाडीहरु र फ्यानहरुको लागि। टिमको लागि पक्कै पनि यो कठिन चुनौती हुनेछ तर यो अवसर पनि हो घरेलु दर्शकको अगाडी आफ्नो ट्यालेन्ट देखाउने।”
“मलाई बिश्वास छ खेलाडीहरुले यो अवसरको राम्रो सदुपयोग गर्नेछ, अझ उनीहरुको राम्रो प्रदर्शनले इन्डियन प्रिमियर लिग ( आईपीएल ) को बाटो समेत खोल्न सक्नेछ”
भारतले आएरल्याण्ड बिरुद्ध टि-२० अन्तर्राष्ट्रिय खेल एउटा मात्र खेलेको छ। इंगल्याण्डको ट्रेन्ट ब्रिजमा सन् २००७ मा भारतले आएरल्याण्डसंग एक टि-२० खेल खेलेको थियो। भारतले सो खेलको नतिजा ८ विकेटले आफ्नो नाम गरेको थियो।
आएरल्याण्डको छोटो भ्रमण पछि भारत इंगल्याण्डतर्फ प्रस्थान गर्नेछ। इंगल्याण्डमा रहंदा भारतले ३ टि-२०, ३ एक दिवसीय र ५ टेस्ट खेल्ने टुंगो लागेको छ।
