- विकेटनेपाल, २५ पौष- मंगलबार
न्युजिल्याण्डमा जारि ५ एकदिवसीयको शृंखला अन्तर्गत पाकिस्तानले दोश्रो एकदिवसीयमा पनि न्युजिल्याण्डसंग हार बेहोरेको छ।
नेल्सन मैदानमा सम्पन्न खेलमा टस जितेर ब्याटिंग गरेको पाकिस्तानले पहिलो इनिंगमा ५० ओभर ब्याटिंग गर्दै ९ विकेट गुमाई २४६ रन बनाएको थियो। भ्रमण टिमको लागि हसन अलिले विस्फोटक ब्याटिंग गर्दै मात्र ३१ बलमा ५१ रनको इनिंग खेलेका थिए। मोहम्मद हफिजले सर्बाधिक ६० तथा शदाब खानले ५२ रनको योगदान दिए।
लकी फर्गुसनले न्युजिल्याण्डको लागि सर्बाधिक ३ विकेट ( १०-०-३९-३ ) हात पारे भने टिम साउथी र टड एस्लेले २/२ विकेट आफ्नो नाम गरे।
जवाफमा ब्याटिंग गरेको न्युजिल्याण्डले १४ ओभरमा ६४ रनको स्कोरमा २ विकेट गुमाएको अवस्थामा पानि परेपछि न्युजिल्याण्डले २५ ओभरमा १५१ रनको लक्ष पाएको थियो। ११ ओभर ८७ रनको नयाँ लक्ष पाएको न्युजिल्याण्डले ७ बल बाँकी छदै लक्ष पुरा गर्यो।
ओपनर मार्टिन गुप्टिलले विस्फोटक इनिंग खेल्दै मात्र ७१ बलमा ५ छक्का र ५ चौका मदतले अविजित ८६ रन बनाए। यस्तै रस टेलरले अविजित ४५ रन योगदान दिए। तेश्रो विकेटको लागि दुई ब्याट्सम्यानले १०४ रनको साझेदारी गरेका थिए। कोलिन मुनरो ( ० ) र कप्तान विलियमसन ( १९ ) चाडै आउट भएका थिए।
पाकिस्तान बलर मोहम्मद आमिर र फहीम अशरफले १/१ विकेट आफ्नो नाम गरे।
पाकिस्तानले यस अघि पहिलो एकदिवसीयमा पनि न्युजिल्याण्डले डी/एल मेथडको आधारमा ६१ रनको जित हात पारेको थियो। तेश्रो एकदिवसीय डुनेडीनमा जनवरी १३ मा खेलिनेछ।
( फोटो – आईसीसी )
