काठमाडौं । नेपालले तेस्रो पटक महिला एसिया कपमा सहभागीता जनाउँदै छ । २०१२ र २०१६ को एसिया कपमा सहभागीता जनाएको नेपालको लागि नवौं संस्करणमा यस सहभागीता तेस्रो हुनेछ ।
गएको वर्ष फागुनमा मलेसियामा सम्पन्न एसीसी महिला प्रिमियर कपको फाइनल पुग्न नसके पछि नेपालको एसिया कप खेल्ने सपना सकिएको थियो । तर, एसियाली क्रिकेट काउन्सिल (एसीसी( ले गत वर्षको चैतमा जारी गरेको खेल तालिकामा नेपालले प्रवेश पाएको जनाएको थियो ।
महिला एसिया कपमा सहभागी रहने राष्ट्रको संख्या बढाएसँगै नेपालले एसिया कप खेल्ने मौका पाएको हो । यस अघि प्रतियोगितामा प्रिमियर कपको फाइनलमा पुगेका दुई तथा अफगानिस्तान बाहेक एसियाका चार टेस्ट राष्ट्रको सहभागीता रहने नियम थियो । तर, प्रिमियर कपमा सेमिफाइनलसम्म पुगेका नेपाल र थाइल्यान्डलाई समेत यो मौका दिदै एसीसीले सहभागी राष्ट्रको संख्या ६ बाट ८ पुर्याएको हो ।
यसरी प्रतियोगिताको छनोट चरणबाट बाहिरिसकेको नेपालले एसिया कपमा मौका पाएको हो ।
एसिया कपमा नेपाल समूह ए मा छ । यस समूहमा नेपाल, भारत, पाकिस्तान र युएई छन् । युएईसँग खेल्दै नेपालले प्रतियोगिताको सुरुआत गर्ने छ । यस संस्करणको एसिया कप आगामी जुलाई १९ देखि २८ सम्म श्रीलंकामा हुदैछ ।
प्रतियोगिताको समूह बी मा आयोजक श्रीलंका, बंगलादेश, मलेसिया र थाइल्यान्ड रहेका छन् । हरेक समूहका शीर्ष दुई राष्ट्रले सेमिफाइनलमा स्थान बनाउँनेछन् । सेमिफाइनलका दुवै खेल २६ जुलाईमा हुनेछ । दुवै सेमिफाइलका विजेताबीच २८ जुलाइमा फाइनल खेल हुनेछ ।