काठमाडौं । नवौं संस्करणको टी-२० विश्वकपको तेस्रो खेलमा समूह बी को नामिबियाले ओमानलाई सुपर ओभरमा पराजित गरेको छ ।
वेस्ट इन्डिजको बारबाडोसमा प्रतियोगिताको आफ्नो पहिलो खेल जितका साथ सुरुआत गर्ने क्रममा नामिबियाले सुपर ओभरमा ११ रनको जित निकालको हो ।
सुपर ओभरमा पहिले ब्याटिङमा आएको नामिबियाले २१ रन बनायो । उसका लागि डेबिड विजाले ४ बलको सामना गर्दै १३ रन बनाए । अर्को तर्फ कप्तान ग्रेहार्ड इरास्मसले २ बलमा सहयोगमा ८ रन बनाए । ओमानका लागि बलिङमा बिलाल खान आएका थिए ।
नामिबियाले दिएको २२ रनको लक्ष्य पछ्याएको ओमानले १० रन मात्र बनाउन सक्यो । ओमानका लागि नसिम खुसिले ३ बलमा २ बनाउँदै सुपर ओभरको तेस्रो बलमा आउट भए । खुसि आउट भएसँगै क्रिजमा आएका कप्तान अकिब ईल्यासले २ बलमा ७ रन बनाए । जिशान मक्शुदले १ बलमा १ रन बनाए ।
नामिबियाका लागि डेबिड विजे बलिङमा आएका थिए ।
सुपर ओभर अघि ओमानले दिएको १ सय १० रनको लक्ष्य नामिबियाले २० ओभरमा ६ विकेट गुमाएर १ सय ९ रन नै बनाएको थियो ।
नामिबियाको जितमा जान फ्रायलिंकले ४८ बलमा ६ चौकाको सहयोगमा ४५ रनको ईनिङ खेले । निकोलस डाभिनले ३१ बलमा २४ तथा कप्तान ग्रेहार्ड इरास्मसले १६ बलमा १३ रन बनाए । अन्तिम ओभरमा नामिबियालाई जितका लागि ५ रन चाहिएको अवस्थामा मेहरान खानको कसिलो बलिङ गरेका थिए ।
अन्तिम ओभरमा मेहरानले २ विकेट लिदै ३ रन खर्चिएका थिए ।
ओमानका लागि मेहरान खानले तीन तथा बिलाल खान, अकिब इल्यास र आयन खानले समान एक एक विकेट लिए ।
त्यसअघि टस हारेर पहिले ब्याटिङ गरेको ओमानले १९ दशमलब ४ ओभरमा अल आउट हुदै १ सय ९ रनमा समेटिएको थियो ।
ओमानका लागि खालिद कैलले ३९ बलमा १ चौका र १ छक्काको सहयोगमा सर्वाधिक ३४ रन बनाए । जिशान मक्सुदले २० बलमा २२ तथा आयान खानले २१ बलमा १५ रन बनाए ।
इनिङको सुरुआती दुई बलमा विकेट लिदै सुरु गरेको नामिबियाले नियमित रुपमा विकेट लिदै ओमानलाई कम योगफलमा नै समेट्न सफल भयो ।
नामिबियाका लागि रुबेन ट्रम्पलम्यानले चार तथा डेबिड बिजेले तीन विकेट लिए । ग्रेहार्ड इरास्मसले दुई विकेट लिए ।
जितका साथ नामिबिया समूह बी को शीर्ष स्थानमा छ ।
नवौं संस्करणको विश्वकपमा पहिलो पहिलो पटक २० राष्ट्रको सहभागीता रहेको छ । सहभागी २० राष्ट्रलाई चार समूहमा विभाजन गरिएको छ ।
समूह बी मा नामिबिया र ओमानका अलावा अस्ट्रेलिया, इंग्ल्यान्ड, स्कटल्यान्ड तथा समूह ए मा क्यानडा, अमेरिका, भारत, पाकिस्तान र आयरल्यान्ड रहेका छन् ।
समूह सी मा पीएनजी, वेस्ट इन्डिजका, न्युजिल्यान्ड, अफगानिस्तान, युगान्डा तथा समूह डी मा नेपाल, नेदरल्यान्ड्स, दक्षिण अफ्रिका, श्रीलंका र बंगलादेश छन् ।
हरेक समूहका शीर्ष दुई टोलीले सुपर आठमा स्थान बनाउने छन् । सुपर आठमा पनि दुई समूह हुनेछ । सुपर आठका हरेक समूहका शीर्ष दुई टोलीले सेमिफाइनलमा स्थान बनाउँने छन् ।
सेमिफाइनलका विजेता टोलीले फाइनलमा स्थान बनाउँदा फाइनलमा विजयी बन्ने टोलीले यस संस्करणको उपाधी जित्नेछ ।
विश्वकपमा नेपालको पहिलो खेल भने नेदरल्यान्ड्सविरुद्ध ४ जुन अर्थात जेठ २२ मा रहेको छ ।