- विकेटनेपाल, माघ १३ – शनिबार
बंगलादेशमा भएको जिम्बाबे र श्रीलंका सम्मिलित त्रिकोणात्मक एकदिवसीय सिरिजमा आयोजक बंगलादेशलाई पराजित गर्दै श्रीलंकाले उपाधीमा कब्जा गरेको छ । श्रीलंका ७९ रनले बिजयी भएको छ ।
शेरे बंगला मैदानमा भएको खेलमा श्रीलंकाले दिएको २२२ रनको लक्ष्य पछ्याउने क्रममा बंगलादेश ४१.१ ओभरमा मात्र १४२ रन बनाउदा सबै विकेट गुमाएपछी बंगलादेश पराजित भएको हो ।
बंगलादेशले सुरुवाती विकेट छिट्टै गुमाउदा २२ रनमा ३ विकेट गुमाईसकेको थियो तर चौथो विकेटको लागि महामदुल्लाह र मुस्फिक़र रहिमले ५८ रनको साझेदारी गरे । रहिम २२ रनमा आउट भएपछी बंगलादेशले पुनः लगातार विकेट गुमाउदै १४२ रनमा ९ विकेट गुमाएको थियो ।
बंगलादेशका लागि महामदुल्लाहले ७६ रन बनाउन ९२ बलमा ६ चौका र ३ छक्का प्रहार गरेपनि अन्य ब्याट्सम्यानले साथ दिन सकेनन् ।
साकिब अल हसन रिटायर्ड हर्ट भए ।
श्रीलंकाका लागि शेहन मदुशान्काले ३ विकेट लिन २६ रन खर्चिदा दुश्मन्था चमेरा र अकिला धनन्जयले २/२ विकेट हात पारे ।
यसअघि टस जितेर ब्याटिंग गरेको श्रीलंकाले ५० ओभरमा सबै विकेट गुमाउदै २२१ रन बनाएको थियो ।
उसका लागि उपुल थरंगाले ५६ रन बनाउन ९९ बलमा ५ चौका प्रहार गरे त्यस्तै एन्जेलो म्याथुज घाइते भएपछी कप्तानी गरिरहेका दिनेश चंदिमालले ४५, निरोशन डीकेविल्लाले ४२ रन बनाउदै माथिलो क्रमका ब्याट्सम्यानले राम्रो सुरुवात दिएका थिए ।
तर बंगलादेशका रुबेल हुसैनले ४६ रन खर्चेर ४ विकेट लिएपछि श्रीलंकाको तल्लोक्रमले रन जोड्न सकेन । मुस्ताफिजुर रहमानले पनि २ विकेट हात पारे ।
खेलमा ५६ रन बनाएका उपुल थरंगा म्यान अफ द म्याच घोषित भए ।
