काठमाडौं । नेपाली राष्ट्रिय महिला क्रिकेट टोलीले पहिलो पटक फ्लड लाइटमा क्रिकेट खेल्ने भएको छ ।
एसियाली क्रिकेट परिषदले मंगलबार जारी गरेको महिला एसिया कपको खेल तालिका अनुसार नेपालले फ्लड लाइटमा पहिलो पटक खेल्ने भएको हो ।
आगामी महिना श्रीलंकामा हुने एसिया कपमा पाकिस्तानविरुद्धको खेल नेपाली टोलीले फ्लड लाइटमा खेल्ने पहिलो खेल हुनेभएको छ ।
नेपाल र पाकिस्तानबीचको खेल २१ जुलाई अर्थात साउन ६ मा श्रीलंकाको डम्बुलामा नेपाली समय अनुसार साँझ सवा सातमा हुनेछ ।
सन् २००७ मा मलेसियामा भएको एसीसी वमेन्स टुर्नामेन्टमा सहभागीता जनाउदै अन्तर्राष्ट्रिय क्रिकेट यात्राको सुरुआत गरेको नेपाली टोलीले पहिलो पटक रात्रीकालीन अन्तर्राष्ट्रिय क्रिकेटको अनुभव लिदैछ ।
नवौं संस्करणको एसीसी महिला एसिया कप आगामी जुलाई १९ बाट श्रीलंकामा सुरु हुदैछ । प्रतियोगितामा नेपाल सहित आठ राष्ट्रको सहभागीता रहेको छ । सहभागी आठ राष्ट्रलाई दुई समूहमा विभाजन गरिएको छ ।
प्रतियोगितामा नेपाल डिफेन्डिङ च्याम्पियन भारतसँगै समूह ए मा रहेको छ । समूह ए मा नेपाल र भारतका अलावा पाकिस्तान र युएई छन् । प्रतियोगितामा नेपालको पहिलो खेल १९ जुलाईमा युएईविरुद्ध रहेको छ ।
उता, समूह बी मा बंगलादेश, मलेसिया, श्रीलंका र थाइल्यान्ड छन् ।
तेस्रो पटक सहभागी पटक प्रतियोगितामा सहभागी हुन लागेको हो । यस अघि नेपालले २०१२ र २०१६ को एसिया कपमा सहभागीता जनाईसकेको थियो । यस प्रतियोगिताको तयारीका लागि नेपाली टोली हाल बन्द प्रशिक्षणमा रहेको छ ।
