काठमाडौं । १७ औँ संस्करणको इण्डियन प्रिमियर लिग (आइपिएल) अन्तर्गत नवौं खेलमा आज (बिहिबार) राजस्थान रोयल्स र दिल्ली क्यापिटल्सबीच भिडन्त हुँदैछ ।
राजस्थान रोयल्सको घरेलु मैदान सवाइमान सिंह क्रिकेट स्टेडियम जयपुरमा हुने खेल नेपाली समय अनुसार राति पौने ८ बाट शुरु हुनेछ ।
जारी सिजनमा राजस्थान रोयल्सले आफ्नो पहिलो खेल जितेको थियो । दिल्लीले भने आफ्नो पहिलो खेलमा हार व्यहोरेको छ।
राजस्थानले अघिल्लो खेलमा लखनउ सुपर जाइन्टलाई पराजित गरेको थियो । दिल्ली भने पञ्जाव किंग्ससँग पराजित भएको थियो।
राजस्थान यस सिजनमा पनि सन्जु सामसनको कप्तानीमा खेल्दै छ। राजस्थान रोयल्स आइपिएलको पहिलो सिजनको विजेता हो । २०२२ को उपविजेता टिम हो।
त्यसैगरी दिल्ली क्यापिटल्स ऋषभ पन्तको कप्तानीमा यस सिजनको आइपिएल खेल्दै छ । दुर्घटनाका कारण लामो समय क्रिकेटबाट टाढा रहेका पन्तले आइपीएलबाट क्रिकेटमा पुनरागमन गरेका छन्।
दिल्ली क्यापिटल्सको आइपीएलमा २०२० मा उपविजेता बनेको थियो । यो नै उसको अहिलेसम्मको सबैभन्दा राम्रो प्रदर्शन हो ।